Read the Bible

¹ Abiit autem Abimelech filius Ierobbaal in Sichem ad fratres matris suae et locutus est ad eos et ad omnem cognationem familiae matris suae dicens:

² "Loquimini ad omnes viros Sichem: "Quid vobis est melius, ut dominentur vestri septuaginta viri, omnes filii Ierobbaal, an ut dominetur vobis unus vir? Simulque considerate quod os vestrum et caro vestra sum"".

³ Locutique sunt fratres matris eius de eo ad omnes viros Sichem universos sermones istos et inclinaverunt cor eorum post Abimelech dicentes: "Frater noster est".

⁴ Dederuntque illi septuaginta pondo argenti de fano Baalberith; qui conduxit sibi ex eo viros inopes et vagos, secutique sunt eum.

⁵ Et venit in domum patris sui Ephra et occidit fratres suos filios Ierobbaal septuaginta viros super lapidem unum. Remansitque Ioatham filius Ierobbaal minimus, quia absconditus erat.

⁶ Congregati sunt autem omnes viri Sichem et universae domus Mello abieruntque et constituerunt regem Abimelech iuxta quercum, quae stabat in Sichem.

⁷ Quod cum nuntiatum esset Ioatham, ivit et stetit in vertice montis Garizim elevataque voce clamavit et dixit: "Audite me, viri Sichem, ut audiat vos Deus.

⁸ Ierunt ligna, ut ungerent super se regem, dixeruntque olivae: "Impera nobis".

⁹ Quae respondit: "Numquid possum deserere pinguedinem meam, qua et dii honorantur et homines, et venire, ut super ligna movear?".

¹⁰ Dixeruntque ligna ad arborem ficum: "Veni et super nos regnum accipe".

¹¹ Quae respondit eis: "Numquid possum deserere dulcedinem meam fructusque suavissimos et ire, ut super cetera ligna movear?".

¹² Locuta quoque sunt ligna ad vitem: "Veni et impera nobis".

¹³ Quae respondit: "Numquid possum deserere vinum meum, quod laetificat deos et homines, et super ligna cetera commoveri?".

¹⁴ Dixeruntque omnia ligna ad rhamnum: "Veni et impera super nos".

¹⁵ Quae respondit eis: "Si vere me regem vobis constituitis, venite et sub mea umbra requiescite; sin autem non vultis, egrediatur ignis de rhamno et devoret cedros Libani!".

¹⁶ Nunc igitur, si recte et absque peccato constituistis super vos regem Abimelech et bene egistis cum Ierobbaal et cum domo eius et reddidistis vicem beneficiis eius,

¹⁷ qui pugnavit pro vobis et animam suam dedit periculis, ut erueret vos de manu Madian,

¹⁸ qui nunc surrexistis contra domum patris mei et interfecistis filios eius septuaginta viros super unum lapidem et constituistis regem Abimelech filium ancillae eius super habitatores Sichem, eo quod frater vester sit;

¹⁹ si ergo recte et absque vitio egistis cum Ierobbaal et domo eius hodie, laetamini in Abimelech, et ille laetetur in vobis.

²⁰ Sin autem perverse, egrediatur ignis ex Abimelech et consumat habitatores Sichem et domum Mello, egrediaturque ignis de viris Sichem et de domo Mello et devoret Abimelech!".

²¹ Quae cum Ioatham dixisset, fugit et abiit in Bera habitavitque ibi metu Abimelech fratris sui.

²² Regnavit itaque Abimelech super Israel tribus annis.

²³ Misitque Deus spiritum pessimum inter Abimelech et habitatores Sichem, qui rebellaverunt contra eum,

²⁴ ut scelus interfectionis septuaginta filiorum Ierobbaal et effusio sanguinis eorum veniret super Abimelech fratrem suum et in viros Sichimorum, qui eum adiuverant.

²⁵ Posueruntque insidias adversus eum in montium summitate et exercebant latrocinia agentes praedas de omnibus praetereuntibus. Nuntiatumque est Abimelech.

²⁶ Venit autem Gaal filius Ebed cum fratribus suis et transivit in Sichimam, et confisi sunt habitatores Sichem in eo.

²⁷ Egressi in agros vindemiaverunt vineas uvasque calcaverunt et, factis cantantium choris, ingressi sunt fanum dei sui et inter epulas et pocula maledicebant Abimelech,

²⁸ clamante Gaal filio Ebed: "Quis est Abimelech, et quae est Sichem, ut serviamus ei? Numquid non est filius Ierobbaal et Zebul praefectus eius? Servite viris Hemmor patris Sichem! Cur serviemus ei?

²⁹ Utinam daret aliquis populum istum sub manu mea, ut auferrem de medio Abimelech et dicerem ei: Congrega exercitus multitudinem et veni".

³⁰ Zebul princeps civitatis, auditis sermonibus Gaal filii Ebed, iratus est valde

³¹ et misit clam ad Abimelech nuntios dicens: "Ecce Gaal filius Ebed venit in Sichimam cum fratribus suis et excitant adversum te civitatem.

³² Surge itaque nocte cum populo, qui tecum est, et latita in agro.

³³ Et primo mane, oriente sole, irrue super civitatem; illo autem egrediente adversum te cum populo suo, fac ei, quod potueris".

³⁴ Surrexit itaque Abimelech cum omni exercitu suo nocte et tetendit insidias iuxta Sichimam in quattuor locis.

³⁵ Egressusque est Gaal filius Ebed et stetit in introitu portae civitatis; surrexit autem Abimelech et omnis exercitus cum eo de insidiarum loco.

³⁶ Cumque vidisset populum Gaal, dixit ad Zebul: "Ecce de montibus multitudo descendit". Cui ille respondit: "Umbras montium vides quasi homines".

³⁷ Rursumque Gaal ait: "Ecce populus de Umbilico terrae descendit, et unus cuneus venit per viam Quercus Augurum".

³⁸ Cui dixit Zebul: "Ubi est nunc os tuum, quo loquebaris: "Quis est Abimelech, ut serviamus ei?". Nonne iste est populus, quem despiciebas? Egredere et pugna contra eum".

³⁹ Abiit ergo Gaal, spectante Sichimorum populo, et pugnavit contra Abimelech.

⁴⁰ Qui persecutus est eum fugientem, cecideruntque ex parte eius plurimi usque ad portam civitatis.

⁴¹ Et Abimelech sedit in Aruma; Zebul autem Gaal et fratres eius expulit de urbe nec in ea passus est commorari.

⁴² Sequenti ergo die egressus est populus in campum. Quod cum nuntiatum esset Abimelech,

⁴³ tulit exercitum suum et divisit in tres turmas tendens insidias in agris. Vidensque quod egrederetur populus de civitate, surrexit et percussit eos.

⁴⁴ Irruensque cum cuneo suo obsedit ingressum portae civitatis; duae autem turmae palantes per campum adversarios percusserunt.

⁴⁵ Porro Abimelech omni illo die oppugnabat urbem, quam cepit, interfectis habitatoribus eius ipsaque destructa, ita ut sal in ea dispergeret.

⁴⁶ Quod cum audissent, qui habitabant in turre Sichimorum, ingressi sunt cryptam fani Elberith (id est dei Foederis).

⁴⁷ Abimelech quoque audiens omnes viros turris Sichimorum pariter conglobatos,

⁴⁸ ascendit in montem Selmon cum omni populo suo et, arrepta securi, praecidit arboris ramum impositumque ferens umero dixit ad socios: "Quod me viditis facere, cito facite".

⁴⁹ Igitur certatim ramos de arboribus praecidentes sequebantur ducem, quos circumdantes cryptae succenderunt; atque ita factum est, ut fumo et igne omnes homines necarentur, circiter mille viri pariter ac mulieres, habitatores turris Sichem.

⁵⁰ Abimelech autem inde proficiscens venit ad oppidum Thebes, quod obsidebat et cepit.

⁵¹ Erat autem turris fortis in media civitate, ad quam confugerant viri simul ac mulieres et omnes cives civitatis, clausa firmissime ianua, et super turris tectum stantes per propugnacula.

⁵² Accedensque Abimelech iuxta turrim pugnabat fortiter et appropinquans ostio ignem supponere nitebatur.

⁵³ Et ecce una mulier superiorem molam desuper iaciens illisit capiti Abimelech et confregit cerebrum eius.

⁵⁴ Qui vocavit cito armigerum suum et ait ad eum: "Evagina gladium tuum et percute me, ne forte dicatur quod a femina interfectus sim". Qui transfodit eum.

⁵⁵ Illoque mortuo, omnes viri Israel hoc videntes reversi sunt in sedes suas.

⁵⁶ Et reddidit Deus malum, quod fecerat Abimelech contra patrem suum, interfectis septuaginta fratribus suis.

⁵⁷ Sichimitis quoque, quod operati erant, retributum est, et venit super eos maledictio Ioatham filii Ierobbaal.