Read the Bible

¹ Tunc ergo apprehendit Pi latus Iesum et flagellavit. ² Et milites, plectentes coronam de spinis, imposuerunt capiti eius et veste purpurea circumdederunt eum; ³ et veniebant ad eum et dicebant: "Ave, rex Iudaeorum!", et dabant ei alapas. ⁴ Et exiit iterum Pilatus foras et dicit eis: "Ecce adduco vobis eum foras, ut cognoscatis quia in eo invenio causam nullam". ⁵ Exiit ergo Iesus foras, portans spineam coronam et purpureum vestimentum. Et dicit eis: "Ecce homo!". ⁶ Cum ergo vidissent eum pontifices et ministri, clamaverunt dicentes: "Crucifige, crucifige!". Dicit eis Pilatus: "Accipite eum vos et crucifigite; ego enim non invenio in eo causam". ⁷ Responderunt ei Iudaei: "Nos legem habemus, et secundum legem debet mori, quia Filium Dei se fecit". ⁸ Cum ergo audisset Pilatus hunc sermonem, magis timuit ⁹ et ingressus est praetorium iterum et dicit ad Iesum: "Unde es tu?". Iesus autem responsum non dedit ei. ¹⁰ Dicit ergo ei Pilatus: "Mihi non loqueris? Nescis quia potestatem habeo dimittere te et potestatem habeo crucifigere te?". ¹¹ Respondit Iesus: "Non haberes potestatem adversum me ullam, nisi tibi esset datum desuper; propterea, qui tradidit me tibi, maius peccatum habet". ¹² Exinde quaerebat Pilatus dimittere eum; Iudaei autem clamabant dicentes: "Si hunc dimittis, non es amicus Caesaris! Omnis, qui se regem facit, contradicit Caesari". ¹³ Pilatus ergo, cum audisset hos sermones, adduxit foras Iesum et sedit pro tribunali in locum, qui dicitur Lithostrotos, Hebraice autem Gabbatha. ¹⁴ Erat autem Parasceve Paschae, hora erat quasi sexta. Et dicit Iudaeis: "Ecce rex vester!". ¹⁵ Clamaverunt ergo illi: "Tolle, tolle, crucifige eum!". Dicit eis Pilatus: "Regem vestrum crucifigam?". Responderunt pontifices: "Non habemus regem, nisi Caesarem".

¹⁶ Tunc ergo tradidit eis illum, ut crucifigeretur. Susceperunt ergo Iesum. ¹⁷ Et baiulans sibi crucem exivit in eum, qui dicitur Calvariae locum, quod Hebraice dicitur Golgotha, ¹⁸ ubi eum crucifixerunt et cum eo alios duos hinc et hinc, medium autem Iesum.

¹⁹ Scripsit autem et titulum Pilatus et posuit super crucem; erat autem scriptum: "Iesus Nazarenus Rex Iudaeorum". ²⁰ Hunc ergo titulum multi legerunt Iudaeorum, quia prope civitatem erat locus, ubi crucifixus est Iesus; et erat scriptum Hebraice, Latine, Graece. ²¹ Dicebant ergo Pilato pontifices Iudaeorum: "Noli scribere: Rex Iudaeorum, sed: Ipse dixit: "Rex sum Iudaeorum"". ²² Respondit Pilatus: "Quod scripsi, scripsi!". ²³ Milites ergo cum crucifixissent Iesum, acceperunt vestimenta eius et fecerunt quattuor partes, unicuique militi partem, et tunicam. Erat autem tunica inconsutilis, desuper contexta per totum. ²⁴ Dixerunt ergo ad invicem: "Non scindamus eam, sed sortiamur de illa,cuius sit", ut Scriptura impleatur dicens: "Partiti sunt vestimenta mea sibi et in vestem meam miserunt sortem". Et milites quidem haec fecerunt. ²⁵ Stabant autem iuxta crucem Iesu mater eius et soror matris eius, Maria Cleopae, et Maria Magdalene. ²⁶ Cum vidisset ergo Iesus matrem et discipulum stantem, quem diligebat, dicit matri: "Mulier, ecce filius tuus". ²⁷ Deinde dicit discipulo: "Ecce mater tua". Et ex illa hora accepit eam discipulus in sua. ²⁸ Post hoc sciens Iesus quia iam omnia consummata sunt, ut consummaretur Scriptura, dicit: "Sitio". ²⁹ Vas positum erat aceto plenum; spongiam ergo plenam aceto hyssopo circumponentes, obtulerunt ori eius. ³⁰ Cum ergo accepisset acetum, Iesus dixit: "Consummatum est!". Et inclinato capite tradidit spiritum.

³¹ Iudaei ergo, quoniam Parasceve erat, ut non remanerent in cruce corpora sabbato, erat enim magnus dies illius sabbati, rogaverunt Pilatum, ut frangerentur eorum crura, et tollerentur. ³² Venerunt ergo milites et primi quidem fregerunt crura et alterius, qui crucifixus est cum eo; ³³ ad Iesum autem cum venissent, ut viderunt eum iam mortuum, non fregerunt eius crura, ³⁴ sed unus militum lancea latus eius aperuit, et continuo exivit sanguis et aqua. ³⁵ Et qui vidit, testimonium perhibuit, et verum est eius testimonium, et ille scit quia vera dicit, ut et vos credatis. ³⁶ Facta sunt enim haec, ut Scriptura impleatur: "Os non comminuetur eius", ³⁷ et iterum alia Scriptura dicit: "Videbunt in quem transfixerunt".

³⁸ Post haec autem rogavit Pilatum Ioseph ab Arimathaea, qui erat discipulus Iesu, occultus autem propter metum Iudaeorum, ut tolleret corpus Iesu; et permisit Pilatus. Venit ergo et tulit corpus eius. ³⁹ Venit autem et Nicodemus, qui venerat ad eum nocte primum, ferens mixturam myrrhae et aloes quasi libras centum. ⁴⁰ Acceperunt ergo corpus Iesu et ligaverunt illud linteis cum aromatibus, sicut mos Iudaeis est sepelire. ⁴¹ Erat autem in loco, ubi crucifixus est, hortus, et in horto monumentum novum, in quo nondum quisquam positus erat. ⁴² Ibi ergo propter Parascevem Iudaeorum, quia iuxta erat monumentum, posuerunt Iesum.