Read the Bible

¹ Super hoc expavit cor meum et emotum est de loco suo. ² Audite fremitum vocis eius et murmur de ore illius procedens. ³ Subter omnes caelos ipsum revolvit, et lumen illius super terminos terrae. ⁴ Post eum rugiet sonitus, tonabit voce magnitudinis suae; et non retardabit, cum audita fuerit vox eius. ⁵ Tonabit Deus in voce sua mirabiliter, qui facit magna et inscrutabilia.

⁶ Qui praecipit nivi, ut descendat in terram, et hiemis pluviis et imbri, ut roborentur. ⁷ Qui in manu omnium hominum signat, ut noverint singuli opera sua. ⁸ Ingredietur bestia latibulum et in antro suo morabitur. ⁹ Ab interioribus egredietur tempestas, et ab Arcturo frigus. ¹⁰ Flante Deo, datur gelu, et expansio aquarum solidatur. ¹¹ Fulgur proicitur a nube, et nubes spargunt lumen suum; ¹² quae lustrant per circuitum, quocumque eas voluntas gubernantis duxerit, ad omne, quod praeceperit illis super faciem orbis terrarum, ¹³ sive in castigatione terrae suae, sive in misericordia eas iusserit inveniri.

¹⁴ Ausculta haec, Iob; sta et considera mirabilia Dei. ¹⁵ Numquid scis quando praeceperit Deus, ut ostenderent lucem nubes eius? ¹⁶ Numquid nosti semitas nubium magnas et mirabilia perfecti scientia? ¹⁷ Nonne vestimenta tua calida sunt, cum quieverit terra austro? ¹⁸ Tu forsitan cum eo expandisti caelos, qui solidissimi, quasi aere, fusi sunt? ¹⁹ Ostende nobis quid dicamus illi; nos disponere verba nescimus propter tenebras. ²⁰ Quis narrabit ei, quae loquor? Et, si locutus fuerit, homo deglutietur.

²¹ At nunc non vident lucem: aer offuscatus est nubibus, sed ventus transiens fugabit eas. ²² Ab aquilone splendor auri venit; et circa Deum terribilis maiestas. ²³ Omnipotentem attingere non possumus: magnus fortitudine; et iudicium et multam iustitiam deprimere non potest. ²⁴ Ideo timebunt eum homines, non contemplabitur omnes, qui sibi videntur corde sapientes".