Read the Bible

¹ Respondens autem Eliphaz Themanites dixit: ² "Numquid Deo prodesse potest homo, cum vix intellegens sibi ipse proderit? ³ Quid prodest Omnipotenti, si iustus fueris, aut quid ei confers, si immaculatam feceris viam tuam? ⁴ Numquid pro tua pietate arguet te et veniet tecum in iudicium?

⁵ Et non propter malitiam tuam plurimam et infinitas iniquitates tuas? ⁶ Sumpsisti enim pignori fratres tuos sine causa et nudos spoliasti vestibus. ⁷ Aquam lasso non dedisti et esurienti cohibuisti panem. ⁸ Numquid viro forti brachio erit terra, et acceptus sedebit in ea? ⁹ Viduas dimisisti vacuas et lacertos pupillorum comminuisti. ¹⁰ Propterea circumdatus es laqueis, et conturbat te subita formido. ¹¹ Vel tenebras non vides, et impetus aquarum opprimit te. ¹² "Nonne Deus excelsior caelo? Et inspice stellarum verticem: quam sublimis!". ¹³ Et dicis: "Quid enim novit Deus et quasi per caliginem iudicat? ¹⁴ Nubes latibulum eius, nec nostra considerat; et circa orbem caeli perambulat".

¹⁵ Numquid semitam saeculorum custodire cupis, quam calcaverunt viri iniqui? ¹⁶ Qui sublati ante tempus suum, et fluvius subvertit fundamentum eorum. ¹⁷ Qui dicebant Deo: "Recede a nobis!" et "Quid faciet Omnipotens nobis?". ¹⁸ Cum ille implesset domos eorum bonis, quorum sententia procul erat ab eo. ¹⁹ Videbunt iusti et laetabuntur, et innocens subsannabit eos: ²⁰ "Vere succisus est status eorum, et reliquias eorum devoravit ignis".

²¹ Acquiesce igitur ei, et habeto pacem; et per haec habebis fructus optimos. ²² Suscipe ex ore illius legem et pone sermones eius in corde tuo. ²³ Si reversus fueris ad Omnipotentem, aedificaberis et longe facies iniquitatem a tabernaculo tuo. ²⁴ Comparabis tamquam terram aurum et tamquam glaream torrentis Ophir. ²⁵ Eritque Omnipotens metallum tuum, et argentum coacervabitur tibi. ²⁶ Tunc super Omnipotentem deliciis afflues et elevabis ad Deum faciem tuam. ²⁷ Supplex rogabis eum, et exaudiet te, et vota tua reddes. ²⁸ Decernes rem, et veniet tibi, et in viis tuis splendebit lumen. ²⁹ Quia humiliat eum, qui loquitur superba, et demissus oculis ipse salvabitur. ³⁰ Eripiet innocentem, eripietur autem in munditia manuum suarum".