Read the Bible

¹ Et factum est in diebus Achaz filii Ioatham filii Oziae regis Iu dae, ascendit Rasin rex Syriae et Phacee filius Romeliae rex Israel in Ierusalem ad proeliandum contra eam; et non potuerunt debellare eam. ² Et nuntiaverunt domui David dicentes: "Requievit Syria super Ephraim". Et commotum est cor eius et cor populi eius, sicut moventur ligna silvarum a facie venti. ³ Et dixit Dominus ad Isaiam: "Egredere in occursum Achaz, tu et Seariasub (id est Reliquiae revertentur) filius tuus, ad extremum aquaeductus piscinae superioris in viam agri fullonis; ⁴ et dices ad eum: Vide, ut sileas; noli timere, et cor tuum ne formidet a duabus caudis titionum fumigantium istorum, ob ardorem irae Rasin et Syriae et filii Romeliae, ⁵ eo quod consilium malum inierit contra te Syria, Ephraim et filius Romeliae dicentes: ⁶ "Ascendamus ad Iudam et terrorem iniciamus ei et avellamus eum ad nos et ponamus regem in medio eius filium Tabeel"". ⁷ Haec dicit Dominus Deus: "Non stabit et non erit! ⁸ Caput enim Syriae Damascus, et caput Damasci Rasin; et adhuc sexaginta et quinque anni et desinet Ephraim esse populus; ⁹ et caput Ephraim Samaria, et caput Samariae filius Romeliae. Si non credideritis, non permanebitis".

¹⁰ Et adiecit Dominus loqui ad Achaz dicens: ¹¹ "Pete tibi signum a Domino Deo tuo in profundum inferni sive in excelsum supra". ¹² Et dixit Achaz: "Non petam et non tentabo Dominum". ¹³ Et dixit: "Audite ergo, domus David; numquid parum vobis est molestos esse hominibus, quia molesti estis et Deo meo? ¹⁴ Propter hoc dabit Dominus ipse vobis signum. Ecce, virgo concipiet et pariet filium et vocabit nomen eius Emmanuel; ¹⁵ butyrum et mel comedet, ut ipse sciat reprobare malum et eligere bonum. ¹⁶ Quia antequam sciat puer reprobare malum et eligere bonum, desolabitur terra, cuius tu formidas duos reges;

¹⁷ adducet Dominus super te et super populum tuum et super domum patris tui dies, qui non venerunt a diebus separationis Ephraim a Iuda, regem Assyriorum". ¹⁸ Et erit in die illa: sibilabit Dominus muscae, quae est in extremo fluminum Aegypti, et api, quae est in terra Assur; ¹⁹ et venient et requiescent omnes in vallibus praeruptis et in cavernis petrarum et in omnibus frutetis et in omnibus pascuis. ²⁰ In die illa radet Dominus in novacula conducta e regione trans flumen C in rege Assyriorum C caput et pilos pedum et barbam quoque abradet. ²¹ Et erit in die illa: nutriet homo vitulam et duas oves ²² et prae ubertate lactis comedet butyrum; butyrum enim et mel manducabit omnis, qui relictus fuerit in medio terrae. ²³ Et erit in die illa: omnis locus, ubi fuerint mille vites mille argenteis, spinae et vepres erunt. ²⁴ Cum sagittis et arcu ingredientur illuc, vepres enim et spinae erit universa terra. ²⁵ Et in omnes montes, qui in sarculo sarriebantur, nemo veniet prae terrore spinarum et veprium, et erit in pascua bovis et in conculcationem pecoris.