Read the Bible

¹ Ecce in iustitia regnabit rex, et principes in iudicio praee runt. ² Et erit vir sicut latibulum a vento et refugium a tempestate, sicut rivi aquarum in sitiente terra et umbra petrae magnae in terra arida. ³ Non caligabunt oculi videntium, et aures audientium diligenter auscultabunt, ⁴ et cor stultorum intelleget scientiam, et lingua balborum velociter loquetur et plane. ⁵ Non vocabitur ultra is, qui insipiens est, nobilis, neque fraudulentus appellabitur maior; ⁶ stultus enim fatua loquitur, et cor eius cogitat iniquitatem, ut perficiat impietatem et loquatur contra Dominum errores et vacuam faciat animam esurientem et potum sitienti auferat. ⁷ Fraudulenti fraudes pessimae sunt; ipse enim cogitationes concinnat ad perdendos mites in sermone mendaci, etiam quando pauper iudicium vindicat. ⁸ Nobilis vero consilia nobilia dat et ipse ad nobilia assurget.

⁹ Mulieres vanae, surgite, audite vocem meam; filiae confidentes, percipite auribus eloquium meum. ¹⁰ Post dies enim et annum vos pavebitis confidentes; consummata est enim vindemia, collectio ultra non veniet. ¹¹ Obstupescite, vanae; pavete, confidentes, exuite vos et nudate vos, accingite lumbos vestros. ¹² Super ubera plangite, super regione desiderabili, super vinea fertili. ¹³ Super humum populi mei spinae et vepres ascendent, super omnes domos gaudii, super civitatem exsultantem. ¹⁴ Domus enim dimissa est; multitudo urbis relicta est, Ophel et Bahan erunt speluncae usque in aeternum, gaudium onagrorum, pascua gregum, ¹⁵ donec effundatur super nos spiritus de excelso. Et erit desertum in hortum, et hortus in saltum reputabitur, ¹⁶ et habitabit in solitudine iudicium, et iustitia in horto sedebit; ¹⁷ et erit opus iustitiae pax, et cultus iustitiae silentium, et securitas usque in sempiternum. ¹⁸ Et sedebit populus meus in habitatione pacis et in tabernaculis fiduciae et in locis securis. ¹⁹ Et penitus cadet saltus, et profunde deprimetur civitas. ²⁰ Beati, qui seminatis super omnes aquas, immittentes pedem bovis et asini.