Read the Bible

¹ Adam vero cognovit Evam uxo rem suam, quae concepit et peperit Cain dicens: "Acquisivi virum per Dominum". ² Rursusque peperit fratrem eius Abel. Et fuit Abel pastor ovium et Cain agricola.

³ Factum est autem post aliquot dies ut offerret Cain de fructibus agri munus Domino. ⁴ Abel quoque obtulit de primogenitis gregis sui et de adipibus eorum. Et respexit Dominus ad Abel et ad munus eius, ⁵ ad Cain vero et ad munus illius non respexit. Iratusque est Cain vehementer, et concidit vultus eius.

⁶ Dixitque Dominus ad eum: "Quare iratus es, et cur concidit facies tua? ⁷ Nonne si bene egeris, vultum attolles? Sin autem male, in foribus peccatum insidiabitur, et ad te erit appetitus eius, tu autem dominaberis illius".

⁸ Dixitque Cain ad Abel fratrem suum: "Egrediamur foras". Cumque essent in agro, consurrexit Cain adversus Abel fratrem suum et interfecit eum.

⁹ Et ait Dominus ad Cain: "Ubi est Abel frater tuus?". Qui respondit: "Nescio. Num custos fratris mei sum ego?". ¹⁰ Dixitque ad eum: "Quid fecisti? Vox sanguinis fratris tui clamat ad me de agro. ¹¹ Nunc igitur maledictus eris procul ab agro, qui aperuit os suum et suscepit sanguinem fratris tui de manu tua! ¹² Cum operatus fueris eum, amplius non dabit tibi fructus suos; vagus et profugus eris super terram".

¹³ Dixitque Cain ad Dominum: "Maior est poena mea quam ut portem eam. ¹⁴ Ecce eicis me hodie a facie agri, et a facie tua abscondar et ero vagus et profugus in terra; omnis igitur, qui invenerit me, occidet me". ¹⁵ Dixitque ei Dominus: "Nequaquam ita fiet, sed omnis qui occiderit Cain, septuplum punietur!". Posuitque Dominus Cain signum, ut non eum interficeret omnis qui invenisset eum.

¹⁶ Egressusque Cain a facie Domini habitavit in terra Nod ad orientalem plagam Eden. ¹⁷ Cognovit autem Cain uxorem suam, quae concepit et peperit Henoch. Et aedificavit civitatem vocavitque nomen eius ex nomine filii sui Henoch. ¹⁸ Porro Henoch genuit Irad, et Irad genuit Maviael, et Maviael genuit Mathusael, et Mathusael genuit Lamech.

¹⁹ Qui accepit uxores duas: nomen uni Ada et nomen alteri Sella. ²⁰ Genuitque Ada Iabel, qui fuit pater habitantium in tentoriis atque pastorum. ²¹ Et nomen fratris eius Iubal; ipse fuit pater omnium canentium cithara et organo. ²² Sella quoque genuit Tubalcain, qui fuit malleator et faber in cuncta opera aeris et ferri. Soror vero Tubalcain Noema.

²³ Dixitque Lamech uxoribus suis: "Ada et Sella, audite vocem meam; uxores Lamech, auscultate sermonem meum: occidi virum pro vulnere meo et adulescentulum pro livore meo; ²⁴ septuplum ultio dabitur de Cain, de Lamech vero septuagies septies".

²⁵ Cognovit quoque Adam uxorem suam, et peperit filium vocavitque nomen eius Seth dicens: "Posuit mihi Deus semen aliud pro Abel, quem occidit Cain". ²⁶ Sed et Seth natus est filius, quem vocavit Enos. Tunc coeperunt invocare nomen Domini.