Read the Bible

¹ Eo tempore descendens Iudas a fratribus suis divertit ad virum Odollamitem nomine Hiram. ² Viditque ibi filiam hominis Chananaei vocabulo Sue et, accepta uxore, ingressus est ad eam. ³ Quae concepit et peperit filium vocavitque nomen eius Her. ⁴ Rursumque concepto fetu, natum filium nominavit Onan. ⁵ Tertium quoque peperit, quem appellavit Sela. Ipsa autem erat in Chasib, quando peperit illum. ⁶ Dedit autem Iudas uxorem primogenito suo Her nomine Thamar. ⁷ Fuit quoque Her primogenitus Iudae nequam in conspectu Domini, et ab eo occisus est. ⁸ Dixit ergo Iudas ad Onan: "Ingredere ad uxorem fratris tui et sociare illi, ut suscites semen fratri tuo". ⁹ Ille, sciens non sibi nasci hunc filium, introiens ad uxorem fratris sui semen fundebat in terram, ne proles fratris nomine nasceretur. ¹⁰ Et idcirco occidit et eum Dominus, quod rem detestabilem fecerat. ¹¹ Quam ob rem dixit Iudas Thamar nurui suae: "Esto vidua in domo patris tui, donec crescat Sela filius meus". Timebat, enim, ne et ipse moreretur sicut fratres eius. Quae abiit et habitavit in domo patris sui.

¹² Evolutis autem multis diebus, mortua est filia Sue uxor Iudae. Qui, post luctum consolatione suscepta, ascendebat ad tonsores ovium suarum ipse et Hiras amicus suus Odollamites in Thamnam. ¹³ Nuntiatumque est Thamar quod socer illius ascenderet in Thamnam ad tondendas oves. ¹⁴ Quae, depositis viduitatis vestibus, cooperuit se velo et, mutato habitu, sedit in porta Enaim in via, quae ducit Thamnam; eo quod crevisset Sela, et non eum accepisset maritum. ¹⁵ Quam cum vidisset Iudas, suspicatus est esse meretricem; operuerat enim vultum suum. ¹⁶ Declinansque ad eam in via ait: "Veni, coeam tecum"; nesciebat enim quod nurus sua esset. Qua respondente: "Quid mihi dabis, ut fruaris concubitu meo?", ¹⁷ dixit: "Mittam tibi haedum de gregibus". Rursum illa dicente: "Si dederis mihi arrabonem, donec mittas illum", ¹⁸ ait Iudas: "Quid vis tibi pro arrabone dari?". Respondit: "Sigillum tuum et funiculum et baculum, quem manu tenes". Et dedit ei. In coitu cum eo mulier concepit ¹⁹ et surgens abiit; depositoque velo, induta est viduitatis vestibus. ²⁰ Misit autem Iudas haedum per amicum suum Odollamitem, ut reciperet pignus, quod dederat mulieri. Qui cum non invenisset eam, ²¹ interrogavit homines loci illius: "Ubi est meretrix, quae sedebat in Enaim in via?". Respondentibus cunctis: "Non fuit in loco isto meretrix", ²² reversus est ad Iudam et dixit ei: "Non inveni eam; sed et homines loci illius dixerunt mihi numquam ibi sedisse scortum". ²³ Ait Iudas: "Habeat sibi; ne simus in ludibrium. Ego misi haedum, quem promiseram, et tu non invenisti eam".

²⁴ Ecce autem post tres menses nuntiaverunt Iudae dicentes: "Fornicata est Thamar nurus tua et gravida est ex fornicatione". Dixitque Iudas: "Producite eam, ut comburatur". ²⁵ Quae cum educeretur ad poenam, misit ad socerum suum dicens: "De viro, cuius haec sunt, concepi; cognosce cuius sit sigillum et funiculus et baculus". ²⁶ Qui, agnitis pignoribus, ait: "Iustior me est, quia non tradidi eam Sela filio meo". Attamen ultra non cognovit illam. ²⁷ Instante autem partu, apparuerunt gemini in utero; atque in ipsa effusione infantium unus protulit manum, in qua obstetrix ligavit coccinum dicens: ²⁸ "Iste egressus est prior". ²⁹ Illo vero retrahente manum, egressus est frater eius; dixitque mulier: "Qualem rupisti tibi rupturam?". Et ob hanc causam vocatum est nomen eius Phares (id est Ruptura). ³⁰ Postea egressus est frater eius, in cuius manu erat coccinum; qui appellatus est Zara (id est Ortus solis).