Read the Bible

¹ Igitur perfecti sunt caeli et terra et omnis exercitus eorum. ² Complevitque Deus die septimo opus suum, quod fecerat, et requievit die septimo ab universo opere, quod patrarat. ³ Et benedixit Deus diei septimo et sanctificavit illum, quia in ipso requieverat ab omni opere suo, quod creavit Deus, ut faceret.

⁴ Istae sunt generationes caeli et terrae, quando creata sunt. In die quo fecit Dominus Deus terram et caelum ⁵ omne virgultum agri, antequam oriretur in terra, omnisque herba regionis, priusquam germinaret; non enim pluerat Dominus Deus super terram, et homo non erat, qui operaretur humum, ⁶ sed fons ascendebat e terra irrigans universam superficiem terrae ⁷ tunc formavit Dominus Deus hominem pulverem de humo et inspiravit in nares eius spiraculum vitae, et factus est homo in animam viventem.

⁸ Et plantavit Dominus Deus paradisum in Eden ad orientem, in quo posuit hominem, quem formaverat. ⁹ Produxitque Dominus Deus de humo omne lignum pulchrum visu et ad vescendum suave, lignum etiam vitae in medio paradisi lignumque scientiae boni et mali. ¹⁰ Et fluvius egrediebatur ex Eden ad irrigandum paradisum, qui inde dividitur in quattuor capita. ¹¹ Nomen uni Phison: ipse est, qui circuit omnem terram Hevila, ubi est aurum; ¹² et aurum terrae illius optimum est; ibi invenitur bdellium et lapis onychinus. ¹³ Et nomen fluvio secundo Geon: ipse est, qui circuit omnem terram Aethiopiae. ¹⁴ Nomen vero fluminis tertii Tigris: ipse vadit ad orientem Assyriae. Fluvius autem quartus ipse est Euphrates. ¹⁵ Tulit ergo Dominus Deus hominem et posuit eum in paradiso Eden, ut operaretur et custodiret illum;

¹⁶ praecepitque Dominus Deus homini dicens: "Ex omni ligno paradisi comede; ¹⁷ de ligno autem scientiae boni et mali ne comedas; in quocumque enim die comederis ex eo, morte morieris".

¹⁸ Dixit quoque Dominus Deus: "Non est bonum esse hominem solum; faciam ei adiutorium simile sui". ¹⁹ Formatis igitur Dominus Deus de humo cunctis animantibus agri et universis volatilibus caeli, adduxit ea ad Adam, ut videret quid vocaret ea; omne enim, quod vocavit Adam animae viventis, ipsum est nomen eius. ²⁰ Appellavitque Adam nominibus suis cuncta pecora et universa volatilia caeli et omnes bestias agri; Adae vero non inveniebatur adiutor similis eius.

²¹ Immisit ergo Dominus Deus soporem in Adam. Cumque obdormisset, tulit unam de costis eius et replevit carnem pro ea; ²² et aedificavit Dominus Deus costam, quam tulerat de Adam, in mulierem et adduxit eam ad Adam. ²³ Dixitque Adam: "Haec nunc os ex ossibus meis et caro de carne mea! Haec vocabitur Virago, quoniam de viro sumpta est haec". ²⁴ Quam ob rem relinquet vir patrem suum et matrem et adhaerebit uxori suae; et erunt in carnem unam. ²⁵ Erant autem uterque nudi, Adam scilicet et uxor eius, et non erubescebant.