Read the Bible

¹ Dixitque Dominus ad Moysen: "Nunc videbis quae facturus sim pharaoni; per manum enim fortem dimittet eos et in manu robusta eiciet illos de terra sua". ² Locutusque est Dominus ad Moysen dicens: "Ego Dominus, ³ qui apparui Abraham, Isaac et Iacob ut Deus omnipotens; et nomen meum Dominum non indicavi eis. ⁴ Pepigique cum eis foedus, ut darem illis terram Chanaan, terram peregrinationis eorum, in qua fuerunt advenae. ⁵ Ego audivi gemitum filiorum Israel, quia Aegyptii oppresserunt eos, et recordatus sum pacti mei. ⁶ Ideo dic filiis Israel: Ego Dominus, qui educam vos de ergastulo Aegyptiorum; et eruam de servitute ac redimam in brachio excelso et iudiciis magnis. ⁷ Et assumam vos mihi in populum et ero vester Deus; et scietis quod ego sum Dominus Deus vester, qui eduxerim vos de ergastulo Aegyptiorum ⁸ et induxerim in terram, super quam levavi manum meam, ut darem eam Abraham, Isaac et Iacob; daboque illam vobis possidendam, ego Dominus". ⁹ Narravit ergo Moyses omnia filiis Israel; qui non acquieverunt ei propter angustiam spiritus et opus durissimum.

¹⁰ Locutusque est Dominus ad Moysen dicens: ¹¹ "Ingredere et loquere ad pharaonem regem Aegypti, ut dimittat filios Israel de terra sua". ¹² Respondit Moyses coram Domino: "Ecce, filii Israel non audiunt me, et quomodo audiet me pharao, praesertim cum incircumcisus sim labiis?". ¹³ Locutusque est Dominus ad Moysen et Aaron et dedit mandatum ad filios Israel et ad pharaonem regem Aegypti, ut educerent filios Israel de terra Aegypti.

¹⁴ Isti sunt principes domorum per familias suas. Filii Ruben primogeniti Israelis: Henoch et Phallu, Hesron et Charmi; hae cognationes Ruben. ¹⁵ Filii Simeon: Iamuel et Iamin et Ahod et Iachin et Sohar er Saul filius Chananitidis; hae progenies Simeon. ¹⁶ Et haec nomina filiorum Levi per cognationes suas: Gerson et Caath et Merari; anni autem vitae Levi fuerunt centum triginta septem. ¹⁷ Filii Gerson: Lobni et Semei per cognationes suas. ¹⁸ Filii Caath: Amram et Isaar et Hebron et Oziel; anni quoque vitae Caath centum triginta tres. ¹⁹ Filii Merari: Moholi et Musi; hae cognationes Levi per familias suas. ²⁰ Accepit autem Amram uxorem Iochabed amitam suam, quae peperit ei Aaron et Moysen; fueruntque anni vitae Amram centum triginta septem. ²¹ Filii quoque Isaar: Core et Napheg et Zechri. ²² Filii quoque Oziel: Misael et Elisaphan et Sethri. ²³ Accepit autem Aaron uxorem Elisabeth filiam Aminadab sororem Naasson, quae peperit ei Nadab et Abiu et Eleazar et Ithamar. ²⁴ Filii quoque Core: Asir et Elcana et Abiasaph; hae sunt cognationes Coritarum. ²⁵ At vero Eleazar filius Aaron accepit uxorem de filiabus Phutiel, quae peperit ei Phinees; hi sunt principes familiarum Leviticarum per cognationes suas. ²⁶ Iste est Aaron et Moyses, quibus praecepit Dominus, ut educerent filios Israel de terra Aegypti per turmas suas. ²⁷ Hi sunt qui loquuntur ad pharaonem regem Aegypti, ut educant filios Israel de Aegypto; iste est Moyses et Aaron ²⁸ in die, qua locutus est Dominus ad Moysen in terra Aegypti. ²⁹ Et locutus est Dominus ad Moysen dicens: "Ego Dominus; loquere ad pharaonem regem Aegypti omnia, quae ego loquor tibi". ³⁰ Et ait Moyses coram Domino: "En incircumcisus labiis sum. Quomodo audiet me pharao?".