Read the Bible

¹ Dixitque Dominus ad Moy sen: "Praecide tibi duas ta bulas lapideas instar priorum, et scribam super eas verba, quae habuerunt tabulae, quas fregisti. ² Esto paratus mane, ut ascendas statim in montem Sinai; stabisque mihi super verticem montis. ³ Nullus ascendat tecum, nec videatur quispiam per totum montem; oves quoque et boves non pascantur e contra". ⁴ Excidit ergo duas tabulas lapideas, quales antea fuerant; et de nocte consurgens ascendit in montem Sinai, sicut praeceperat ei Dominus, portans secum tabulas.

⁵ Cumque descendisset Dominus per nubem, stetit cum eo vocans in nomine Domini. ⁶ Et transiens coram eo clamavit: "Dominus, Dominus Deus, misericors et clemens, patiens et multae miserationis ac verax, ⁷ qui custodit misericordiam in milia, qui aufert iniquitatem et scelera atque peccata, nihil autem impunitum sinit, qui reddit iniquitatem patrum in filiis ac nepotibus in tertiam et quartam progeniem". ⁸ Festinusque Moyses curvatus est pronus in terram et adorans ⁹ ait: "Si inveni gratiam in conspectu tuo, Domine, obsecro, ut gradiaris nobiscum; populus quidem durae cervicis est, sed tu auferes iniquitates nostras atque peccata nosque possidebis".

¹⁰ Respondit Dominus: "Ego inibo pactum coram universo populo tuo; mirabilia faciam, quae numquam visa sunt super totam terram nec in ullis gentibus, ut cernat cunctus populus, in cuius es medio, opus Domini terribile, quod facturus sum tecum. ¹¹ Observa cuncta, quae hodie mando tibi: ego ipse eiciam ante faciem tuam Amorraeum et Chananaeum et Hetthaeum, Pherezaeum quoque et Hevaeum et Iebusaeum. ¹² Cave, ne umquam cum habitatoribus terrae, quam intraveris, iungas amicitias, quae tibi sint in ruinam; ¹³ sed aras eorum destrue, confringe lapides palosque succide. ¹⁴ Noli adorare deum alienum: Dominus Zelotes nomen eius, Deus est aemulator. ¹⁵ Ne ineas pactum cum hominibus illarum regionum, ne, cum fornicati fuerint cum diis suis et sacrificaverint eis, vocet te quispiam, et comedas de immolatis. ¹⁶ Nec uxorem de filiabus eorum accipies filiis tuis, ne, postquam ipsae fuerint fornicatae cum diis suis, fornicari faciant et filios tuos in deos suos. ¹⁷ Deos conflatiles non facies tibi.

¹⁸ Sollemnitatem Azymorum custodies: septem diebus vesceris azymis, sicut praecepi tibi, in tempore constituto mensis Abib; mense enim verni temporis egressus es de Aegypto. ¹⁹ Omne, quod aperit vulvam generis masculini, meum erit; de cuncto grege tuo tam de bobus quam de ovibus meum erit. ²⁰ Primogenitum asini redimes ove, sin autem nec pretium pro eo dederis, franges cervicem eius. Primogenitum filiorum tuorum redimes; nec apparebis in conspectu meo vacuus. ²¹ Sex diebus operaberis, die septimo cessabis etiam arare et metere. ²² Sollemnitatem Hebdomadarum facies tibi in primitiis frugum messis tuae triticeae et sollemnitatem Collectae, quando, redeunte anni tempore, cuncta conduntur. ²³ Tribus temporibus anni apparebit omne masculinum tuum in conspectu omnipotentis Domini, Dei Israel. ²⁴ Cum enim tulero gentes a facie tua et dilatavero terminos tuos, nullus insidiabitur terrae tuae, ascendente te et apparente in conspectu Domini Dei tui ter in anno. ²⁵ Non immolabis super fermento sanguinem hostiae meae; neque residebit mane de victima sollemnitatis Paschae. ²⁶ Primitias frugum terrae tuae afferes in domum Domini Dei tui. Non coques haedum in lacte matris suae". ²⁷ Dixitque Dominus ad Moysen: "Scribe tibi verba haec, quibus et tecum et cum Israel pepigi foedus".

²⁸ Fuit ergo ibi cum Domino quadraginta dies et quadraginta noctes; panem non comedit et aquam non bibit et scripsit in tabulis verba foederis, decem verba. ²⁹ Cumque descenderet Moyses de monte Sinai, tenebat duas tabulas testimonii et ignorabat quod resplenderet cutis faciei suae ex consortio sermonis Domini. ³⁰ Videntes autem Aaron et filii Israel resplendere cutem faciei Moysi, timuerunt prope accedere; ³¹ vocatique ab eo reversi sunt tam Aaron quam principes synagogae. Et postquam locutus est ad eos, ³² venerunt ad eum etiam omnes filii Israel; quibus praecepit cuncta, quae audierat a Domino in monte Sinai. ³³ Impletisque sermonibus, posuit velamen super faciem suam, ³⁴ quod ingressus ad Dominum et loquens cum eo auferebat, donec exiret; et tunc loquebatur ad filios Israel omnia, quae sibi fuerant imperata. ³⁵ Qui videbant cutem faciei Moysi resplendere, sed operiebat ille rursus faciem suam, donec ingressus loqueretur cum eo.