Read the Bible

¹ Dixit Dominus ad Moysen et Aaron in terra Aegypti: ² "Mensis iste vobis principium mensium, primus erit in mensibus anni. ³ Loquimini ad universum coetum filiorum Israel et dicite eis: Decima die mensis huius tollat unusquisque agnum per familias et domos suas. ⁴ Sin autem minor est numerus, ut sufficere possit ad vescendum agnum, assumet vicinum suum, qui iunctus est domui suae, iuxta numerum animarum, quae sufficere possunt ad esum agni. ⁵ Erit autem vobis agnus absque macula, masculus, anniculus; quem de agnis vel haedis tolletis ⁶ et servabitis eum usque ad quartam decimam diem mensis huius; immolabitque eum universa congregatio filiorum Israel ad vesperam. ⁷ Et sument de sanguine eius ac ponent super utrumque postem et in superliminaribus domorum, in quibus comedent illum; ⁸ et edent carnes nocte illa assas igni et azymos panes cum lactucis amaris. ⁹ Non comedetis ex eo crudum quid nec coctum aqua, sed tantum assum igni; caput cum pedibus eius et intestinis vorabitis. ¹⁰ Nec remanebit quidquam ex eo usque mane; si quid residuum fuerit, igne comburetis. ¹¹ Sic autem comedetis illum: renes vestros accingetis, calceamenta habebitis in pedibus, tenentes baculos in manibus, et comedetis festinanter; est enim Pascha (id est Transitus) Domini! ¹² Et transibo per terram Aegypti nocte illa percutiamque omne primogenitum in terra Aegypti ab homine usque ad pecus; et in cunctis diis Aegypti faciam iudicia, ego Dominus. ¹³ Erit autem sanguis vobis in signum in aedibus, in quibus eritis; et videbo sanguinem et transibo vos, nec erit in vobis plaga disperdens, quando percussero terram Aegypti. ¹⁴ Habebitis autem hanc diem in monumentum et celebrabitis eam sollemnem Domino in generationibus vestris cultu sempiterno. ¹⁵ Septem diebus azyma comedetis. Iam in die primo non erit fermentum in domibus vestris; quicumque comederit fermentatum, a primo die usque ad diem septimum, peribit anima illa de Israel. ¹⁶ Dies prima erit sancta atque sollemnis, et dies septima eadem festivitate venerabilis. Nihil operis facietis in eis, exceptis his, quae ad vescendum pertinent. ¹⁷ Et observabitis azyma, in eadem enim ipsa die eduxi exercitum vestrum de terra Aegypti; et custodietis diem istum in generationes vestras ritu perpetuo. ¹⁸ Primo mense, quarta decima die mensis ad vesperam comedetis azyma; usque ad diem vicesimam primam eiusdem mensis ad vesperam. ¹⁹ Septem diebus fermentum non invenietur in domibus vestris. Qui comederit fermentatum, peribit anima eius de coetu Israel, tam de advenis quam de indigenis terrae. ²⁰ Omne fermentatum non comedetis; in cunctis habitaculis vestris edetis azyma".

²¹ Vocavit autem Moyses omnes seniores filiorum Israel et dixit ad eos: "Ite tollentes animal per familias vestras et immolate Pascha. ²² Fasciculumque hyssopi tingite in sanguine, qui est in pelvi, et aspergite ex eo superliminare et utrumque postem. Nullus vestrum egrediatur ostium domus suae usque mane. ²³ Transibit enim Dominus percutiens Aegyptios; cumque viderit sanguinem in superliminari et in utroque poste, transcendet ostium et non sinet percussorem ingredi domos vestras et laedere. ²⁴ Custodite verbum istud legitimum tibi et filiis tuis usque in aeternum. ²⁵ Cumque introieritis terram, quam Dominus daturus est vobis, ut pollicitus est, observabitis caeremonias istas; ²⁶ et, cum dixerint vobis filii vestri: "Quae est ista religio?", ²⁷ dicetis eis: "Victima Paschae Domino est, quando transivit super domos filiorum Israel in Aegypto percutiens Aegyptios et domos nostras liberans"". Incurvatusque populus adoravit; ²⁸ et egressi filii Israel fecerunt, sicut praeceperat Dominus Moysi et Aaron.

²⁹ Factum est autem in noctis medio, percussit Dominus omne primogenitum in terra Aegypti, a primogenito pharaonis, qui in solio eius sedebat, usque ad primogenitum captivi, qui erat in carcere, et omne primogenitum iumentorum. ³⁰ Surrexitque pharao nocte et omnes servi eius cunctaque Aegyptus, et ortus est clamor magnus in Aegypto, neque enim erat domus, in qua non iaceret mortuus. ³¹ Vocatisque pharao Moyse et Aaron nocte, ait: "Surgite, egredimini a populo meo, vos et filii Israel; ite, immolate Domino, sicut dicitis. ³² Oves vestras et armenta assumite, ut petieratis, et abeuntes benedicite mihi". ³³ Urgebantque Aegyptii populum de terra exire velociter dicentes: "Omnes moriemur". ³⁴ Tulit igitur populus conspersam farinam, antequam fermentaretur; et ligans pistrina in palliis suis posuit super umeros suos. ³⁵ Feceruntque filii Israel, sicut praeceperat Moyses, et petierunt ab Aegyptiis vasa argentea et aurea vestemque plurimam. ³⁶ Dominus autem dedit gratiam populo coram Aegyptiis, ut commodarent eis; et spoliaverunt Aegyptios.

³⁷ Profectique sunt filii Israel de Ramesse in Succoth, sescenta fere milia peditum virorum absque parvulis. ³⁸ Sed et vulgus promiscuum innumerabile ascendit cum eis, oves et armenta, animantia multa nimis. ³⁹ Coxeruntque farinam, quam dudum de Aegypto conspersam tulerant, et fecerunt subcinericios panes azymos; neque enim poterant fermentari, cogentibus exire Aegyptiis et nullam facere sinentibus moram; nec pulmenti quidquam occurrerant praeparare. ⁴⁰ Habitatio autem filiorum Israel, qua manserant in Aegypto, fuit quadringentorum triginta annorum. ⁴¹ Quibus expletis, eadem die egressus est omnis exercitus Domini de terra Aegypti. ⁴² Nox ista vigiliarum Domino, quando eduxit eos de terra Aegypti: hanc observare debent Domino omnes filii Israel in generationibus suis.

⁴³ Dixitque Dominus ad Moysen et Aaron: "Haec est religio Paschae: Omnis alienigena non comedet ex eo; ⁴⁴ omnis autem servus empticius circumcidetur et sic comedet; ⁴⁵ advena et mercennarius non edent ex eo. ⁴⁶ In una domo comedetur, nec efferetis de carnibus eius foras nec os illius confringetis. ⁴⁷ Omnis coetus filiorum Israel faciet illud. ⁴⁸ Quod si quis peregrinorum in vestram voluerit transire coloniam et facere Pascha Domini, circumcidetur prius omne masculinum eius, et tunc rite celebrabit eritque sicut indigena terrae; si quis autem circumcisus non fuerit, non vescetur ex eo. ⁴⁹ Eadem lex erit indigenae et colono, qui peregrinatur apud vos". ⁵⁰ Feceruntque omnes filii Israel, sicut praeceperat Dominus Moysi et Aaron; ⁵¹ et in eadem die eduxit Dominus filios Israel de terra Aegypti per turmas suas.