Read the Bible

¹ Muscae morientes perdunt et corrumpunt oleum unguentarii. Gravior quam sapientia et gloria est parva stultitia. ² Cor sapientis in dextera eius, et cor stulti in sinistra illius. ³ Sed et in via stultus ambulans, cum ipse insipiens sit, omnes stultos aestimat.

⁴ Si spiritus potestatem habentis ascenderit contra te, locum tuum ne dimiseris, quia lenitas faciet cessare peccata maxima. ⁵ Est malum, quod vidi sub sole quasi errorem egredientem a facie principis: ⁶ positum stultum in dignitate sublimi et divites sedere deorsum. ⁷ Vidi servos in equis et principes ambulantes super terram quasi servos. ⁸ Qui fodit foveam, incidet in eam; et, qui dissipat murum, mordebit eum coluber. ⁹ Qui excidit lapides, affligetur in eis; et, qui scindit ligna, periclitabitur ex eis. ¹⁰ Si retusum fuerit ferrum, et aciem eius non exacueris, labor multiplicabitur, sed lucrum industriae erit sapientia. ¹¹ Si mordeat serpens incantatione neglecta, nihil lucri habet incantator.

¹² Verba oris sapientis gratia, et labia insipientis praecipitabunt eum. ¹³ Initium verborum eius stultitia, et novissimum oris illius insipientia mala. ¹⁴ Stultus verba multiplicat: "Ignorat homo quid futurum sit; et, quid post se futurum sit, quis ei poterit indicare?". ¹⁵ Labor stultorum affliget eos, qui nesciunt in urbem pergere.

¹⁶ Vae tibi, terra, cuius rex puer est, et cuius principes mane comedunt. ¹⁷ Beata terra, cuius rex nobilis est, et cuius principes vescuntur in tempore suo ad reficiendum et non ad luxuriam. ¹⁸ In pigris manibus humiliabitur contignatio, et in remissis perstillabit domus. ¹⁹ In risum faciunt epulas; vinum laetificat vitam, et pecunia praestat omnia. ²⁰ In cogitatione tua regi ne detrahas et in secreto cubiculi tui ne maledixeris diviti, quia et aves caeli portabunt vocem tuam, et, qui habet pennas, annuntiabit sententiam.