Read the Bible

¹ Ascendit ergo Moyses de campestribus Moab super montem Nabo in verticem Phasga contra Iericho; ostenditque ei Dominus omnem terram Galaad usque Dan ² et universum Nephthali terramque Ephraim et Manasse et omnem terram Iudae usque ad mare occidentale ³ et Nageb et latitudinem campi Iericho civitatis palmarum usque Segor. ⁴ Dixitque Dominus ad eum: "Haec est terra, pro qua iuravi Abraham, Isaac et Iacob, dicens: Semini tuo dabo eam. Vidisti eam oculis tuis et non transibis ad illam".

⁵ Mortuusque est ibi Moyses servus Domini in terra Moab, iubente Domino. ⁶ Et sepelivit eum in valle in terra Moab contra Bethphegor; et non cognovit homo sepulcrum eius usque in praesentem diem. ⁷ Moyses centum et viginti annorum erat, quando mortuus est; non caligavit oculus eius, nec robur illius defecit. ⁸ Fleveruntque eum filii Israel in campestribus Moab triginta diebus; et completi sunt dies planctus lugentium Moysen.

⁹ Iosue vero filius Nun repletus est spiritu sapientiae, quia Moyses posuit super eum manus suas; et oboedierunt ei filii Israel feceruntque, sicut praecepit Dominus Moysi. ¹⁰ Et non surrexit ultra propheta in Israel sicut Moyses, quem nosset Dominus facie ad faciem, ¹¹ in omnibus signis atque portentis, quae misit per eum, ut faceret in terra Aegypti pharaoni et omnibus servis eius universaeque terrae illius, ¹² et in cuncta manu robusta magnisque mirabilibus, quae fecit Moyses coram universo Israel.