Read the Bible

¹ Domini, quod iustum est et aequum, servis praestate, scien tes quoniam et vos Dominum habetis in caelo.

² Orationi instate, vigilantes in ea in gratiarum actione, ³ orantes simul et pro nobis, ut Deus aperiat nobis ostium sermonis ad loquendum mysterium Christi, propter quod etiam vinctus sum, ⁴ ut manifestem illud, ita ut oportet me loqui.

⁵ In sapientia ambulate ad eos, qui foris sunt, tempus redimentes. ⁶ Sermo vester semper sit in gratia, sale conditus, ut sciatis quomodo oporteat vos unicuique respondere.

⁷ Quae circa me sunt, omnia vobis nota faciet Tychicus, carissimus frater et fidelis minister et conservus in Domino, ⁸ quem misi ad vos ad hoc ipsum, ut cognoscatis, quae circa nos sunt, et consoletur corda vestra, ⁹ cum Onesimo fideli et carissimo fratre, qui est ex vobis; omnia, quae hic aguntur, nota facient vobis. ¹⁰ Salutat vos Aristarchus concaptivus meus et Marcus consobrinus Barnabae, de quo accepistis mandata si venerit ad vos, excipite illum ¹¹ et Iesus, qui dicitur Iustus, qui sunt ex circumcisione; hi soli adiutores in regno Dei, qui mihi fuerunt solacio. ¹² Salutat vos Epaphras, qui ex vobis est, servus Christi Iesu, semper certans pro vobis in orationibus, ut stetis perfecti et impleti in omni voluntate Dei. ¹³ Testimonium enim illi perhibeo, quod habet multum laborem pro vobis et pro his, qui sunt Laodiciae et qui Hierapoli. ¹⁴ Salutat vos Lucas, medicus carissimus, et Demas. ¹⁵ Salutate fratres, qui sunt Laodiciae, et Nympham et, quae in domo eius est, ecclesiam. ¹⁶ Et cum lecta fuerit apud vos epistula, facite ut et in Laodicensium ecclesia legatur, et eam, quae ex Laodicia est, vos quoque legatis. ¹⁷ Et dicite Archippo: "Vide ministerium, quod accepisti in Domino, ut illud impleas". ¹⁸ Salutatio mea manu Pauli. Memores estote vinculorum meorum. Gratia vobiscum.