Read the Bible

¹ Volo enim vos scire qualem sollicitudinem habeam pro vo bis et pro his, qui sunt Laodiciae, et quicumque non viderunt faciem meam in carne, ² ut consolentur corda ipsorum instructi in caritate et in omnes divitias plenitudinis intellectus, in agnitionem mysterii Dei, Christi, ³ in quo sunt omnes thesauri sapientiae et scientiae absconditi.

⁴ Hoc dico, ut nemo vos decipiat in subtilitate sermonum. ⁵ Nam etsi corpore absens sum, sed spiritu vobiscum sum, gaudens et videns ordinem vestrum et firmamentum eius, quae in Christum est, fidei vestrae. ⁶ Sicut ergo accepistis Christum Iesum Dominum, in ipso ambulate, ⁷ radicati et superaedificati in ipso et confirmati fide, sicut didicistis, abundantes in gratiarum actione. ⁸ Videte, ne quis vos depraedetur per philosophiam et inanem fallaciam secundum traditionem hominum, secundum elementa mundi et non secundum Christum; ⁹ quia in ipso inhabitat omnis plenitudo divinitatis corporaliter, ¹⁰ et estis in illo repleti, qui est caput omnis principatus et potestatis; ¹¹ in quo et circumcisi estis circumcisione non manufacta in exspoliatione corporis carnis, in circumcisione Christi; ¹² consepulti ei in baptismo, in quo et conresuscitati estis per fidem operationis Dei, qui suscitavit illum a mortuis;

¹³ et vos, cum mortui essetis in delictis et praeputio carnis vestrae, convivificavit cum illo, donans nobis omnia delicta, ¹⁴ delens, quod adversum nos erat, chirographum decretis, quod erat contrarium nobis, et ipsum tulit de medio affigens illud cruci; ¹⁵ exspolians principatus et potestates traduxit confidenter, triumphans illos in semetipso.

¹⁶ Nemo ergo vos iudicet in cibo aut in potu aut ex parte diei festi aut neomeniae aut sabbatorum, ¹⁷ quae sunt umbra futurorum, corpus autem Christi. ¹⁸ Nemo vos bravio defraudet complacens sibi in humilitate et religione angelorum propter ea, quae vidit, ingrediens, frustra inflatus sensu carnis suae ¹⁹ et non tenens caput, ex quo totum corpus per nexus et coniunctiones subministratum et compaginatum crescit in augmentum Dei. ²⁰ Si mortui estis cum Christo ab elementis mundi, quid tamquam viventes in mundo decretis subicimini: ²¹ "Ne tetigeris neque gustaveris neque contrectaveris", ²² quae sunt omnia in corruptionem ipso usu secundum praecepta et doctrinas hominum? ²³ Quae sunt rationem quidem habentia sapientiae in superstitione et humilitate, et non parcendo corpori, non in honore aliquo ad saturitatem carnis.