Read the Bible

¹ De cetero, fratres, orate pro nobis, ut sermo Domini currat et glorificetur sicut et apud vos, ² et ut liberemur ab importunis et malis hominibus; non enim omnium est fides. ³ Fidelis autem Dominus est, qui confirmabit vos et custodiet a Malo. ⁴ Confidimus autem de vobis in Domino, quoniam, quae praecipimus, et facitis et facietis. ⁵ Dominus autem dirigat corda vestra in caritatem Dei et patientiam Christi.

⁶ Praecipimus autem vobis, fratres, in nomine Domini nostri Iesu Christi, ut subtrahatis vos ab omni fratre ambulante inordinate et non secundum traditionem, quam acceperunt a nobis. ⁷ Ipsi enim scitis quemadmodum oporteat imitari nos, quoniam non inordinati fuimus inter vos ⁸ neque grats panem manducavimus ab aliquo sed in labore et fatigatione, nocte et die operantes, ne quem vestrum gravaremus; ⁹ non quasi non habuerimus potestatem, sed ut nosmetipsos formam daremus vobis ad imitandum nos. ¹⁰ Nam et cum essemus apud vos, hoc praecipiebamus vobis: Si quis non vult operari, nec manducet. ¹¹ Audimus enim inter vos quosdam ambulare inordinate, nihil operantes sed curiose agentes; ¹² his autem, qui eiusmodi sunt, praecipimus et obsecramus in Domino Iesu Christo, ut cum quiete operantes suum panem manducent. ¹³ Vos autem, fratres, nolite deficere benefacientes. ¹⁴ Quod si quis non oboedit verbo nostro per epistulam, hunc notate, non commisceamini cum illo, ut confundatur; ¹⁵ et nolite quasi inimicum existimare, sed corripite ut fratrem.

¹⁶ Ipse autem Dominus pacis det vobis pacem sempiternam in omni modo. Dominus cum omnibus vobis. ¹⁷ Salutatio mea manu Pauli, quod est signum in omni epistula; ita scribo. ¹⁸ Gratia Domini nostri Iesu Christi cum omnibus vobis.