Read the Bible

¹ Haec autem sunt verba David novissima: "Dixit David filius Isai, dixit vir constitutus in alto, christus Dei Iacob, suavis psalta Israel. ² Spiritus Domini locutus est per me, et sermo eius super linguam meam. ³ Locutus est Deus Israel, mihi dixit Petra Israel: "Dominator hominum iustus, dominator in timore Dei ⁴ est sicut lux aurorae, oriente sole, mane absque nubibus; de splendore post pluviam herba oritur de terra". ⁵ Nonne sic est domus mea cum Deo? Quia pactum aeternum statuit mihi, dispositum in omnibus atque munitum. Cunctam enim salutem meam et omne desiderabile nonne faciet germinare? ⁶ Praevaricatores autem quasi spinae abiectae universi, quae non tolluntur manibus; ⁷ et si quis tangere voluerit eas, armabitur ferro et ligno lanceato, igneque succensae comburentur".

⁸ Haec nomina fortium David: Iesbaal Hachamonites, princeps inter tres, ipse levavit hastam suam super octingentos, quos interfecit impetu uno. ⁹ Post hunc Eleazar filius Dodo Ahohites, inter tres fortes. Qui erat cum David in Aphesdommim, quando Philisthim congregati sunt illuc in proelium. ¹⁰ Cumque ascendissent viri Israel, ipse stetit et percussit Philisthaeos, donec deficeret manus eius et obrigesceret cum gladio; fecitque Dominus salutem magnam in die illa, et populus reversus est tantum ad spolia detrahenda. ¹¹ Et post hunc Samma filius Age Ararites. Et congregati sunt Philisthim in Lehi; erat quippe ibi ager lente plenus. Cumque fugisset populus a facie Philisthim, ¹² stetit ille in medio agri et tuitus est eum percussitque Philisthaeos, et fecit Dominus salutem magnam. ¹³ Et descenderunt tres de triginta et venerunt tempore messis ad David in speluncam Odollam; castra autem Philisthinorum erant posita in valle Raphaim. ¹⁴ Et David erat tunc in praesidio; porro statio Philisthinorum tunc erat in Bethlehem. ¹⁵ Desideravit igitur David et ait: "O si quis mihi daret potum aquae de cisterna, quae est in Bethlehem iuxta portam!". ¹⁶ Irruperunt ergo tres fortes castra Philisthinorum et hauserunt aquam de cisterna Bethlehem, quae erat iuxta portam, et attulerunt ad David. At ille noluit bibere, sed libavit illam Domino ¹⁷ dicens: "Propitius mihi sit Dominus, ne faciam hoc. Num sanguinem hominum istorum, qui profecti sunt in animarum periculo, bibam?". Noluit ergo bibere. Haec fecerunt tres robustissimi. ¹⁸ Abisai autem frater Ioab filius Sarviae princeps erat de triginta. Ipse est qui elevavit hastam suam contra trecentos, quos interfecit. Nominatus in triginta ¹⁹ et inter triginta nobilior eratque eorum princeps; sed usque ad tres primos non pervenerat. ²⁰ Et Banaias filius Ioiadae vir fortissimus magnorum operum de Cabseel. Ipse percussit duos filios Ariel de Moab, et ipse descendit et percussit leonem in media cisterna in diebus nivis. ²¹ Ipse quoque interfecit virum Aegyptium, virum procerae staturae habentem in manu hastam; itaque cum descendisset ad eum cum baculo, vi extorsit hastam de manu Aegyptii et interfecit eum hasta sua. ²² Haec fecit Banaias filius Ioiadae, et ipse nominatus inter triginta fortissimos. ²³ Erat autem nobilior inter triginta; verumtamen usque ad tres non pervenerat. Fecitque eum David sibi caput satellitum suorum. ²⁴ Asael frater Ioab erat inter triginta. Elchanan filius Dodo de Bethlehem, ²⁵ Samma de Harod, Elica de Harod, ²⁶ Heles de Phalti, Hira filius Acces de Thecua, ²⁷ Abiezer de Anathoth, Sobbochai de Husa, ²⁸ Selmon Ahohites, Maharai Netophathites, ²⁹ Heled filius Baana Netophathites, Ithai filius Ribai de Gabaa filiorum Beniamin, ³⁰ Banaia Pharathonites, Heddai de torrentibus Gaas, ³¹ Abibaal Arbathites, Azmaveth de Bahurim, ³² Eliaba de Saalbon, Iasen de Gun, ³³ Ionathan filius Samma de Arar, Ahiam filius Sarar Ararites. ³⁴ Eliphalet filius Aasbai Maachathitae, Eliam filius Achitophel Gilonites, ³⁵ Hesro de Carmel, Pharai de Arab, ³⁶ Igal filius Nathan de Soba, Bani de Gad, ³⁷ Selec de Ammon, Naharai Berothites armiger Ioab filii Sarviae, ³⁸ Hira Iethrites, Gareb et ipse Iethrites, ³⁹ Urias Hetthaeus. Omnes triginta septem.