Read the Bible

¹ Presbyter electae dominae et filiis eius, quos ego diligo in veritate, et non ego solus, sed et omnes, qui noverunt veritatem, ² propter veritatem, quae permanet in nobis et nobiscum erit in sempiternum. ³ Erit nobiscum gratia, misericordia, pax a Deo Patre et a Iesu Christo, Filio Patris, in veritate et caritate. ⁴ Gavisus sum valde, quoniam inveni de filiis tuis ambulantes in veritate, sicut mandatum accepimus a Patre.

⁵ Et nunc rogo te, domina, non tamquam mandatum novum scribens tibi, sed quod habuimus ab initio, ut diligamus alterutrum. ⁶ Et haec est caritas, ut ambulemus secundum mandata eius; hoc mandatum est, quemadmodum audistis ab initio, ut in eo ambuletis.

⁷ Quoniam multi seductores prodierunt in mundum, qui non confitentur Iesum Christum venientem in carne; hic est seductor et antichristus. ⁸ Videte vosmetipsos, ne perdatis, quae operati estis, sed ut mercedem plenam accipiatis. ⁹ Omnis, qui ultra procedit et non manet in doctrina Christi, Deum non habet; qui permanet in doctri na, hic et Patrem et Filium habet.

¹⁰ Si quis venit ad vos et hanc doctrinam non affert, nolite accipere eum in domum nec "Ave" ei dixeritis; ¹¹ qui enim dicit illi: "Ave", communicat operibus illius malignis.

¹² Plura habens vobis scribere, nolui per chartam et atramentum; spero enim me futurum apud vos, et os ad os loqui, ut gaudium nostrum plenum sit. ¹³ Salutant te filii sororis tuae electae.