Read the Bible

¹ Viginti quinque annorum erat Ioatham, cum regnare coepisset, et sedecim annis regnavit in Ierusalem. Nomen matris eius Ierusa filia Sadoc. ² Fecitque, quod rectum erat coram Domino iuxta omnia, quae fecerat Ozias pater suus, excepto quod non est ingressus templum Domini, et adhuc populus delinquebat. ³ Ipse aedificavit portam domus Domini Superiorem et in muro Ophel multa construxit. ⁴ Urbes quoque aedificavit in montibus Iudae et in saltibus castella et turres. ⁵ Ipse pugnavit contra regem filiorum Ammon et vicit eos, dederuntque ei filii Ammon in anno illo centum talenta argenti et decem milia choros tritici ac totidem choros hordei; haec ei praebuerunt filii Ammon etiam in anno secundo et tertio. ⁶ Corroboratusque est Ioatham, eo quod direxisset vias suas coram Domino Deo suo. ⁷ Reliqua autem gestorum Ioatham et omnes pugnae eius et viae scriptae sunt in libro regum Israel et Iudae. ⁸ Viginti quinque annorum erat, cum regnare coepisset, et sedecim annis regnavit in Ierusalem. ⁹ Dormivitque Ioatham cum patribus suis, et sepelierunt eum in civitate David; et regnavit Achaz filius eius pro eo.