Read the Bible

¹ Similiter mulieres subditae sint suis viris, ut et si qui non cre dunt verbo, per mulierum conversationem sine verbo lucrifiant, ² considerantes castam in timore conversationem vestram; ³ quarum sit non extrinsecus capillaturae aut circumdationis auri aut indumenti vestimentorum cultus, ⁴ sed qui absconditus cordis est homo, in incorruptibilitate mitis et quieti spiritus, qui est in conspectu Dei locuples. ⁵ Sic enim aliquando et sanctae mulieres sperantes in Deo ornabant se subiectae propriis viris, ⁶ sicut Sara oboediebat Abrahae dominum eum vocans: cuius estis filiae benefacientes et non timentes ullam perturbationem. ⁷ Viri similiter cohabitantes secundum scientiam quasi infirmiori vaso muliebri impertientes honorem, tamquam et coheredibus gratiae vitae, uti ne impediantur orationes vestrae.

⁸ In fine autem omnes unanimes, compatientes, fraternitatis amatores, misericordes, humiles, ⁹ non reddentes malum pro malo vel maledictum pro maledicto, sed e contrario benedicentes, quia in hoc vocati estis, ut benedictionem hereditate accipiatis. ¹⁰ "Qui enim vult vitam diligere et videre dies bonos, coerceat linguam suam a malo, ¹¹ et labia eius ne loquantur dolum; declinet autem a malo et faciat bonum, inquirat pacem et persequatur eam. ¹² Quia oculi Domini super iustos, et aures eius in preces eorum; vultus autem Domini super facientes mala". ¹³ Et quis est qui vobis noceat, si boni aemulatores fueritis? ¹⁴ Sed et si patimini propter iustitiam, beati! Timorem autem eorum ne timueritis et non conturbemini, ¹⁵ Dominum autem Christum sanctificate in cordibus vestris, parati semper ad defensionem omni poscenti vos rationem de ea, quae in vobis est spe;

¹⁶ sed cum mansuetudine et timore, conscientiam habentes bonam, ut in quo de vobis detrectatur, confundantur, qui calumniantur vestram bonam in Christo conversationem. ¹⁷ Melius est enim benefacientes, si velit voluntas Dei, pati quam malefacientes.

¹⁸ Quia et Christus semel pro peccatis passus est, iustus pro iniustis, ut vos adduceret ad Deum, mortificatus quidem carne, vivificatus autem Spiritu: ¹⁹ in quo et his, qui in carcere erant, spiritibus adveniens praedicavit, ²⁰ qui increduli fuerant aliquando, quando exspectabat Dei patientia in diebus Noe, cum fabricaretur arca, in qua pauci, id est octo animae, salvae factae sunt per aquam.

²¹ Cuius antitypum, baptisma, et vos nunc salvos facit, non carnis depositio sordium sed conscientiae bonae rogatio in Deum, per resurrectionem Iesu Christi, ²² qui est in dextera Dei, profectus in caelum, subiectis sibi angelis et potestatibus et virtutibus.