Read the Bible

¹ Porro filiis Aaron hae partiones erant. Filii Aaron: Nadab et Abiu et Eleazar et Ithamar. ² Mortui sunt autem Nadab et Abiu ante patrem suum absque liberis; sacerdotioque functus est Eleazar et Ithamar. ³ Et divisit eos David cum Sadoc de filiis Eleazari et cum Achimelech de filiis Ithamar, secundum vices suas et ministerium. ⁴ Inventique sunt multo plures filii Eleazar secundum capita virorum quam filii Ithamar; divisit igitur eis, hoc est filiis Eleazar principes per familias sedecim, et filiis Ithamar per familias et domos suas octo. ⁵ Porro divisit utrasque inter se familias sortibus; erant enim principes sanctuarii et principes Dei tam de filiis Eleazar quam de filiis Ithamar. ⁶ Descripsitque eos Semeias filius Nathanael scriba Levites coram rege et principibus et Sadoc sacerdote et Achimelech filio Abiathar, principibus quoque familiarum sacerdotalium et leviticarum: unam familiam pro Eleazar et unam pro Ithamar. ⁷ Exivit autem sors prima Ioiarib, secunda Iedaiae, ⁸ tertia Harim, quarta Seorim, ⁹ quinta Melchia, sexta Miamin, ¹⁰ septima Accos, octava Abia, ¹¹ nona Iesua, decima Sechenia, ¹² undecima Eliasib, duodecima Iacim, ¹³ tertia decima Hoppha, quarta decima Isbaab, ¹⁴ quinta decima Belga, sexta decima Emmer, ¹⁵ septima decima Hezir, octava decima Aphses, ¹⁶ nona decima Phethahia, vicesima Hezechiel, ¹⁷ vicesima prima Iachin, vicesima secunda Gamul, ¹⁸ vicesima tertia Dalaiau, vicesima quarta Maaziau. ¹⁹ Hae vices eorum secundum ministeria sua, ut ingrediantur domum Domini, et iuxta ritum suum sub manu Aaron patris eorum, sicut praecepit Dominus, Deus Israel.

²⁰ Porro filiorum Levi, qui reliqui fuerant: de filiis Amram Subael et de filiis Subael Iehedeia. ²¹ De filiis quoque Rohobiae princeps Iesias. ²² De Isaaritis vero Salomoth; de filiis Salomoth Iahath. ²³ De Hebronitis: Ieriau, Amarias secundus, Iahaziel tertius, Iecmaam quartus. ²⁴ Filius Oziel Micha; de filiis Micha Samir; ²⁵ frater Micha Iesia; de filiis Iesiae Zacharias. ²⁶ Filii Merari: Moholi et Musi. Filii eius: Iaziau et Bani. ²⁷ Filius Merari: de Iaziau filio suo Soam et Zacchur et Hebri. ²⁸ Porro de Moholi filius Eleazar, qui non habebat liberos. ²⁹ Filius vero Cis Ierameel; ³⁰ filii Musi: Moholi, Eder et Ierimoth. Isti filii Levi secundum familias suas. ³¹ Ipsi quoque miserunt sortes sicut fratres sui, filii Aaron coram David rege et Sadoc et Achimelech et principibus familiarum sacerdotalium et leviticarum tam maiores quam minores; omnes sors aequaliter dividebat.