Read the Bible

¹ Fecit quoque sibi domos in civitate David et praeparavit locum arcae Dei tetenditque ei tabernaculum. ² Tunc dixit David: "Illicitum est, ut a quocumque portetur arca Dei, nisi a Levitis, quos elegit Dominus ad portandum eam et ad ministrandum sibi usque in aeternum". ³ Congregavitque David universum Israel in Ierusalem, ut afferretur arca Domini in locum suum, quem praeparaverat ei; ⁴ necnon et filios Aaron et Levitas. ⁵ De filiis Caath Uriel princeps fuit et fratres eius centum viginti; ⁶ de filiis Merari Asaia princeps et fratres eius ducenti viginti; ⁷ de filiis Gerson Ioel princeps et fratres eius centum triginta; ⁸ de filiis Elisaphan Semeias princeps et fratres eius ducenti; ⁹ de filiis Hebron Eliel princeps et fratres eius octoginta; ¹⁰ de filiis Oziel Aminadab princeps et fratres eius centum duodecim. ¹¹ Vocavitque David Sadoc et Abiathar sacerdotes et Levitas Uriel, Asaiam, Ioel, Semeiam, Eliel et Aminadab ¹² et dixit ad eos: "Vos, qui estis principes familiarum Leviticarum, sanctificamini cum fratribus vestris et afferte arcam Domini, Dei Israel, ad locum, quem praeparavi. ¹³ Quia a principio non eratis praesentes, fecit Dominus, Deus Israel, diruptionem in nobis; non enim quaesivimus eum, sicut fas erat". ¹⁴ Sanctificati sunt ergo sacerdotes et Levitae, ut portarent arcam Domini, Dei Israel; ¹⁵ et tulerunt filii Levi arcam Dei, sicut praeceperat Moyses iuxta verbum Domini, umeris suis in vectibus. ¹⁶ Dixitque David principibus Levitarum, ut constituerent de fratribus suis cantores in organis musicorum, nablis videlicet et lyris et cymbalis, ut resonaret fortiter sonitus laetitiae. ¹⁷ Constitueruntque Levitae Heman filium Ioel et de fratribus eius Asaph filium Barachiae, de filiis vero Merari fratribus eorum Ethan filium Casaiae ¹⁸ et cum eis fratres eorum in secundo ordine Zachariam et Bani et Iaziel et Semiramoth et Iahiel et Ani, Eliab et Banaiam et Maasiam et Matthathiam et Eliphalu et Maceniam et Obededom et Iehiel ianitores. ¹⁹ Porro cantores Heman, Asaph et Ethan in cymbalis aeneis bene sonantibus, ²⁰ Zacharias autem et Oziel et Semiramoth et Iahiel et Ani et Eliab et Maasias et Banaias in nablis secundum "Virgines". ²¹ Porro Matthathias et Eliphalu et Macenias et Obededom et Iehiel et Ozaziu in citharis super octavam, ut dirigerent; ²² Chonenias autem princeps Levitarum portantium arcam praeerat ad portandum, erat quippe valde sapiens. ²³ Et Barachias et Elcana ianitores pro arca. ²⁴ Porro Sebania et Iosaphat et Nathanael et Amasai et Zacharias et Banaias et Eliezer sacerdotes clangebant tubis coram arca Dei, et Obededom et Iehias erant ianitores pro arca.

²⁵ Igitur David et maiores natu Israel et tribuni ierunt ad deportandam arcam foederis Domini de domo Obededom cum laetitia. ²⁶ Cumque adiuvisset Deus Levitas, qui portabant arcam foederis Domini, immolati sunt septem tauri et septem arietes. ²⁷ Porro David indutus pallio byssino et universi Levitae, qui portabant arcam, cantoresque et Chonenias princeps pro portanda arca David autem indutus erat etiam ephod lineo ²⁸ universusque Israel deducebant arcam foederis Domini in iubilo et sonitu bucinae et tubis et cymbalis bene sonantibus et nablis et citharis. ²⁹ Cumque pervenisset arca foederis Domini usque ad civitatem David, Michol filia Saul prospiciens per fenestram vidit regem David saltantem atque ludentem et despexit eum in corde suo.