Read the Bible

¹ [Numquid nosti tempus partus ibicum in petris,
vel parturientes cervas observasti?
² Dinumerasti menses conceptus earum,
et scisti tempus partus earum?
³ Incurvantur ad fœtum, et pariunt,
et rugitus emittunt.
⁴ Separantur filii earum, et pergunt ad pastum:
egrediuntur, et non revertuntur ad eas.
⁵ Quis dimisit onagrum liberum,
et vincula ejus quis solvit?
⁶ cui dedi in solitudine domum,
et tabernacula ejus in terra salsuginis.
⁷ Contemnit multitudinem civitatis:
clamorem exactoris non audit.
⁸ Circumspicit montes pascuæ suæ,
et virentia quæque perquirit.
⁹ Numquid volet rhinoceros servire tibi,
aut morabitur ad præsepe tuum?
¹⁰ Numquid alligabis rhinocerota ad arandum loro tuo,
aut confringet glebas vallium post te?
¹¹ Numquid fiduciam habebis in magna fortitudine ejus,
et derelinques ei labores tuos?
¹² Numquid credes illi quod sementem reddat tibi,
et aream tuam congreget?

¹³ Penna struthionis similis est
pennis herodii et accipitris.
¹⁴ Quando derelinquit ova sua in terra,
tu forsitan in pulvere calefacies ea?
¹⁵ Obliviscitur quod pes conculcet ea,
aut bestia agri conterat.
¹⁶ Duratur ad filios suos, quasi non sint sui:
frustra laboravit, nullo timore cogente.
¹⁷ Privavit enim eam Deus sapientia,
nec dedit illi intelligentiam.
¹⁸ Cum tempus fuerit, in altum alas erigit:
deridet equum et ascensorem ejus.

¹⁹ Numquid præbebis equo fortitudinem,
aut circumdabis collo ejus hinnitum?
²⁰ Numquid suscitabis eum quasi locustas?
gloria narium ejus terror.
²¹ Terram ungula fodit; exultat audacter:
in occursum pergit armatis.
²² Contemnit pavorem,
nec cedit gladio.
²³ Super ipsum sonabit pharetra;
vibrabit hasta et clypeus:
²⁴ fervens et fremens sorbet terram,
nec reputat tubæ sonare clangorem.
²⁵ Ubi audierit buccinam, dicit: Vah!
procul odoratur bellum:
exhortationem ducum, et ululatum exercitus.

²⁶ Numquid per sapientiam tuam plumescit accipiter,
expandens alas suas ad austrum?
²⁷ Numquid ad præceptum tuum elevabitur aquila,
et in arduis ponet nidum suum?
²⁸ In petris manet,
et in præruptis silicibus commoratur,
atque inaccessis rupibus.
²⁹ Inde contemplatur escam,
et de longe oculi ejus prospiciunt.
³⁰ Pulli ejus lambent sanguinem:
et ubicumque cadaver fuerit, statim adest.]

³¹ Et adjecit Dominus, et locutus est ad Job:

³² [Numquid qui contendit cum Deo, tam facile conquiescit?
utique qui arguit Deum, debet respondere ei.]

³³ Respondens autem Job Domino, dixit:

³⁴ [Qui leviter locutus sum, respondere quid possum?
manum meam ponam super os meum.

³⁵ Unum locutus sum, quod utinam non dixissem:
et alterum, quibus ultra non addam.]