Read the Bible

¹ Profectus ergo Jacob venit in terram orientalem.² Et vidit puteum in agro, tres quoque greges ovium accubantes juxta eum: nam ex illo adaquabantur pecora, et os ejus grandi lapide claudebatur.³ Morisque erat ut cunctis ovibus congregatis devolverent lapidem, et refectis gregibus rursum super os putei ponerent.⁴ Dixitque ad pastores: Fratres, unde estis? Qui responderunt: De Haran.⁵ Quos interrogans, Numquid, ait, nostis Laban filium Nachor? Dixerunt: Novimus.⁶ Sanusne est? inquit. Valet, inquiunt: et ecce Rachel filia ejus venit cum grege suo.⁷ Dixitque Jacob: Adhuc multum diei superest, nec est tempus ut reducantur ad caulas greges: date ante potum ovibus, et sic eas ad pastum reducite.⁸ Qui responderunt: Non possumus, donec omnia pecora congregentur, et amoveamus lapidem de ore putei, ut adaquemus greges.

⁹ Adhuc loquebantur, et ecce Rachel veniebat cum ovibus patris sui: nam gregem ipsa pascebat.¹⁰ Quam cum vidisset Jacob, et sciret consobrinam suam, ovesque Laban avunculi sui, amovit lapidem quo puteus claudebatur.¹¹ Et adaquato grege, osculatus est eam: et elevata voce flevit,¹² et indicavit ei quod frater esset patris sui, et filius Rebeccæ: at illa festinans nuntiavit patri suo.¹³ Qui cum audisset venisse Jacob filium sororis suæ, cucurrit obviam ei: complexusque eum, et in oscula ruens, duxit in domum suam. Auditis autem causis itineris,¹⁴ respondit: Os meum es, et caro mea. Et postquam impleti sunt dies mensis unius,

¹⁵ dixit ei: Num quia frater meus es, gratis servies mihi? dic quid mercedis accipias.
¹⁶ Habebat vero duas filias: nomen majoris Lia, minor vero appellabatur Rachel.¹⁷ Sed Lia lippis erat oculis: Rachel decora facie, et venusto aspectu.¹⁸ Quam diligens Jacob, ait: Serviam tibi pro Rachel filia tua minore, septem annis.¹⁹ Respondit Laban: Melius est ut tibi eam dem quam alteri viro: mane apud me.²⁰ Servivit ergo Jacob pro Rachel septem annis: et videbantur illi pauci dies præ amoris magnitudine.²¹ Dixitque ad Laban: Da mihi uxorem meam: quia jam tempus impletum est, ut ingrediar ad illam.²² Qui vocatis multis amicorum turbis ad convivium, fecit nuptias.²³ Et vespere Liam filiam suam introduxit ad eum,²⁴ dans ancillam filiæ, Zelpham nomine. Ad quam cum ex more Jacob fuisset ingressus, facto mane vidit Liam:²⁵ et dixit ad socerum suum: Quid est quod facere voluisti? nonne pro Rachel servivi tibi? quare imposuisti mihi?²⁶ Respondit Laban: Non est in loco nostro consuetudinis, ut minores ante tradamus ad nuptias.²⁷ Imple hebdomadam dierum hujus copulæ: et hanc quoque dabo tibi pro opere quo serviturus es mihi septem annis aliis.²⁸ Acquievit placito: et hebdomada transacta, Rachel duxit uxorem:²⁹ cui pater servam Balam tradiderat.³⁰ Tandemque potitus optatis nuptiis, amorem sequentis priori prætulit, serviens apud eum septem annis aliis.

³¹ Videns autem Dominus quod despiceret Liam, aperuit vulvam ejus, sorore sterili permanente.³² Quæ conceptum genuit filium, vocavitque nomen ejus Ruben, dicens: Vidit Dominus humilitatem meam: nunc amabit me vir meus.³³ Rursumque concepit et peperit filium, et ait: Quoniam audivit me Dominus haberi contemptui, dedit etiam istum mihi; vocavitque nomen ejus Simeon.³⁴ Concepitque tertio, et genuit alium filium: dixitque: Nunc quoque copulabitur mihi maritus meus: eo quod pepererim ei tres filios: et idcirco appellavit nomen ejus Levi.³⁵ Quarto concepit, et peperit filium, et ait: Modo confitebor Domino, et ob hoc vocavit eum Judam: cessavitque parere.