Read the Bible

¹ Locutusque est Dominus ad Moysen, dicens:² Ecce, vocavi ex nomine Beseleel filium Uri filii Hur de tribu Juda,³ et implevi spiritu Dei, sapientia, et intelligentia et scientia in omni opere,⁴ ad excogitandum quidquid fabrefieri potest ex auro, et argento, et ære,⁵ marmore, et gemmis, et diversitate lignorum.⁶ Dedique ei socium Ooliab filium Achisamech de tribu Dan. Et in corde omnis eruditi posui sapientiam: ut faciant cuncta quæ præcepi tibi,⁷ tabernaculum fœderis, et arcam testimonii, et propitiatorium, quod super eam est, et cuncta vasa tabernaculi,⁸ mensamque et vasa ejus, candelabrum purissimum cum vasis suis, et altaris thymiamatis,⁹ et holocausti, et omnia vasa eorum, labrum cum basi sua,¹⁰ vestes sanctas in ministerio Aaron sacerdoti, et filiis ejus, ut fungantur officio suo in sacris:¹¹ oleum unctionis, et thymiama aromatum in sanctuario, omnia quæ præcepi tibi, facient.

¹² Et locutus est Dominus ad Moysen, dicens:¹³ Loquere filiis Israël, et dices ad eos: Videte ut sabbatum meum custodiatis: quia signum est inter me et vos in generationibus vestris: ut sciatis quia ego Dominus, qui sanctifico vos.¹⁴ Custodite sabbatum meum, sanctum est enim vobis: qui polluerit illud, morte morietur; qui fecerit in eo opus, peribit anima illius de medio populi sui.¹⁵ Sex diebus facietis opus: in die septimo sabbatum est, requies sancta Domino; omnis qui fecerit opus in hac die, morietur.¹⁶ Custodiant filii Israël sabbatum, et celebrent illud in generationibus suis. Pactum est sempiternum¹⁷ inter me et filios Israël, signumque perpetuum; sex enim diebus fecit Dominus cælum et terram, et in septimo ab opere cessavit.¹⁸ Deditque Dominus Moysi, completis hujuscemodi sermonibus in monte Sinai, duas tabulas testimonii lapideas, scriptas digito Dei.