Read the Bible

¹ Estote ergo imitatores Dei, sicut filii carissimi,² et ambulate in dilectione, sicut et Christus dilexit nos, et tradidit semetipsum pro nobis, oblationem et hostiam Deo in odorem suavitatis.

³ Fornicatio autem, et omnis immunditia, aut avaritia, nec nominetur in vobis, sicut decet sanctos:⁴ aut turpitudo, aut stultiloquium, aut scurrilitas, quæ ad rem non pertinet: sed magis gratiarum actio.⁵ Hoc enim scitote intelligentes: quod omnis fornicator, aut immundus, aut avarus, quod est idolorum servitus, non habet hæreditatem in regno Christi et Dei.⁶ Nemo vos seducat inanibus verbis: propter hæc enim venit ira Dei in filios diffidentiæ.⁷ Nolite ergo effici participes eorum.
⁸ Eratis enim aliquando tenebræ: nunc autem lux in Domino. Ut filii lucis ambulate:⁹ fructus enim lucis est in omni bonitate, et justitia, et veritate:¹⁰ probantes quid sit beneplacitum Deo:¹¹ et nolite communicare operibus infructuosis tenebrarum, magis autem redarguite.¹² Quæ enim in occulto fiunt ab ipsis, turpe est et dicere.¹³ Omnia autem, quæ arguuntur, a lumine manifestantur: omne enim, quod manifestatur, lumen est.¹⁴ Propter quod dicit: Surge qui dormis, et exsurge a mortuis, et illuminabit te Christus.¹⁵ Videte itaque, fratres, quomodo caute ambuletis: non quasi insipientes,¹⁶ sed ut sapientes: redimentes tempus, quoniam dies mali sunt.¹⁷ Propterea nolite fieri imprudentes, sed intelligentes quæ sit voluntas Dei.¹⁸ Et nolite inebriari vino, in quo est luxuria, sed implemini Spiritu Sancto,¹⁹ loquentes vobismetipsis in psalmis, et hymnis, et canticis spiritualibus, cantantes et psallentes in cordibus vestris Domino,²⁰ gratias agentes semper pro omnibus in nomine Domini nostri Jesu Christi Deo et Patri,

²¹ subjecti invicem in timore Christi.
²² Mulieres viris suis subditæ sint, sicut Domino:²³ quoniam vir caput est mulieris, sicut Christus caput est Ecclesiæ: ipse, salvator corporis ejus.²⁴ Sed sicut Ecclesia subjecta est Christo, ita et mulieres viris suis in omnibus.²⁵ Viri, diligite uxores vestras, sicut et Christus dilexit Ecclesiam, et seipsum tradidit pro ea,²⁶ ut illam sanctificaret, mundans lavacro aquæ in verbo vitæ,²⁷ ut exhiberet ipse sibi gloriosam Ecclesiam, non habentem maculam, aut rugam, aut aliquid hujusmodi, sed ut sit sancta et immaculata.²⁸ Ita et viri debent diligere uxores suas ut corpora sua. Qui suam uxorem diligit, seipsum diligit.²⁹ Nemo enim umquam carnem suam odio habuit: sed nutrit et fovet eam, sicut et Christus Ecclesiam:³⁰ quia membra sumus corporis ejus, de carne ejus et de ossibus ejus.³¹ Propter hoc relinquet homo patrem et matrem suam, et adhærebit uxori suæ, et erunt duo in carne una.³² Sacramentum hoc magnum est, ego autem dico in Christo et in Ecclesia.³³ Verumtamen et vos singuli, unusquisque uxorem suam sicut seipsum diligat: uxor autem timeat virum suum.