Read the Bible

¹ De temporibus autem, et momentis, fratres, non indigetis ut scribamus vobis.² Ipsi enim diligenter scitis quia dies Domini, sicut fur in nocte, ita veniet:³ cum enim dixerint: Pax et securitas: tunc repentinus eis superveniet interitus, sicut dolor in utero habenti, et non effugient.⁴ Vos autem, fratres, non estis in tenebris, ut vos die illa tamquam fur comprehendat:⁵ omnes enim vos filii lucis estis, et filii diei: non sumus noctis, neque tenebrarum.

⁶ Igitur non dormiamus sicut et ceteri, sed vigilemus, et sobrii simus.⁷ Qui enim dormiunt, nocte dormiunt: et qui ebrii sunt, nocte ebrii sunt.⁸ Nos autem, qui diei sumus, sobrii simus, induti loricam fidei et caritatis, et galeam spem salutis:⁹ quoniam non posuit nos Deus in iram, sed in acquisitionem salutis per Dominum nostrum Jesum Christum,¹⁰ qui mortuus est pro nobis: ut sive vigilemus, sive dormiamus, simul cum illo vivamus.

¹¹ Propter quod consolamini invicem, et ædificate alterutrum, sicut et facitis.
¹² Rogamus autem vos, fratres, ut noveritis eos qui laborant inter vos, et præsunt vobis in Domino, et monent vos,¹³ ut habeatis illos abundantius in caritate propter opus illorum: pacem habete cum eis.¹⁴ Rogamus autem vos, fratres, corripite inquietos, consolamini pusillanimes, suscipite infirmos, patientes estote ad omnes.¹⁵ Videte ne quis malum pro malo alicui reddat: sed semper quod bonum est sectamini in invicem, et in omnes.

¹⁶ Semper gaudete.¹⁷ Sine intermissione orate.¹⁸ In omnibus gratias agite: hæc est enim voluntas Dei in Christo Jesu in omnibus vobis.¹⁹ Spiritum nolite extinguere.²⁰ Prophetias nolite spernere.²¹ Omnia autem probate: quod bonum est tenete.²² Ab omni specie mala abstinete vos.

²³ Ipse autem Deus pacis sanctificet vos per omnia: ut integer spiritus vester, et anima, et corpus sine querela in adventu Domini nostri Jesu Christi servetur.²⁴ Fidelis est, qui vocavit vos: qui etiam faciet.
²⁵ Fratres, orate pro nobis.²⁶ Salutate fratres omnes in osculo sancto.²⁷ Adjuro vos per Dominum ut legatur epistola hæc omnibus sanctis fratribus.²⁸ Gratia Domini nostri Jesu Christi vobiscum. Amen.