Read the Bible

¹ In finem, pro Idithun. Psalmus David.² Nonne Deo subjecta erit anima mea ? ab ipso enim salutare meum.³ Nam et ipse Deus meus et salutaris meus ; susceptor meus, non movebor amplius.⁴ Quousque irruitis in hominem ? interficitis universi vos, tamquam parieti inclinato et maceriæ depulsæ ?

⁵ Verumtamen pretium meum cogitaverunt repellere ; cucurri in siti ; ore suo benedicebant, et corde suo maledicebant.⁶ Verumtamen Deo subjecta esto, anima mea, quoniam ab ipso patientia mea ;⁷ quia ipse Deus meus et salvator meus, adjutor meus, non emigrabo.⁸ In Deo salutare meum et gloria mea ; Deus auxilii mei, et spes mea in Deo est.