Read the Bible

¹ Igitur Eliu hæc rursum locutus est :² Numquid æqua tibi videtur tua cogitatio, ut diceres : Justior sum Deo ?³ Dixisti enim : Non tibi placet quod rectum est : vel quid tibi proderit, si ego peccavero ?⁴ Itaque ego respondebo sermonibus tuis, et amicis tuis tecum.⁵ Suspice cælum, et intuere : et contemplare æthera quod altior te sit.⁶ Si peccaveris, quid ei nocebis ? et si multiplicatæ fuerint iniquitates tuæ, quid facies contra eum ?⁷ Porro si juste egeris, quid donabis ei ? aut quid de manu tua accipiet ?⁸ Homini qui similis tui est, nocebit impietas tua : et filium hominis adjuvabit justitia tua.⁹ Propter multitudinem calumniatorum clamabunt, et ejulabunt propter vim brachii tyrannorum.¹⁰ Et non dixit : Ubi est Deus qui fecit me, qui dedit carmina in nocte,

¹¹ qui docet nos super jumenta terræ, et super volucres cæli erudit nos ?¹² Ibi clamabunt, et non exaudiet propter superbiam malorum.¹³ Non ergo frustra audiet Deus, et Omnipotens causas singulorum intuebitur.¹⁴ Etiam cum dixeris : Non considerat : judicare coram illo, et expecta eum.¹⁵ Nunc enim non infert furorem suum, nec ulciscitur scelus valde.¹⁶ Ergo Job frustra aperit os suum, et absque scientia verba multiplicat.