Read the Bible

¹ Et dicebat illis : Amen dico vobis, quia sunt quidam de hic stantibus, qui non gustabunt mortem donec videant regnum Dei veniens in virtute.² Et post dies sex assumit Jesus Petrum, et Jacobum, et Joannem, et ducit illos in montem excelsum seorsum solos, et transfiguratus est coram ipsis.³ Et vestimenta ejus facta sunt splendentia, et candida nimis velut nix, qualia fullo non potest super terram candida facere.⁴ Et apparuit illis Elias cum Moyse : et erant loquentes cum Jesu.⁵ Et respondens Petrus, ait Jesu : Rabbi, bonum est nos hic esse : et faciamus tria tabernacula, tibi unum, et Moysi unum, et Eliæ unum.⁶ Non enim sciebat quid diceret : erant enim timore exterriti.⁷ Et facta est nubes obumbrans eos : et venit vox de nube, dicens : Hic est Filius meus carissimus : audite illum.⁸ Et statim circumspicientes, neminem amplius viderunt, nisi Jesum tantum secum.⁹ Et descendentibus illis de monte, præcepit illis ne cuiquam quæ vidissent, narrarent : nisi cum Filius hominis a mortuis resurrexerit.

¹⁰ Et verbum continuerunt apud se : conquirentes quid esset, cum a mortuis resurrexerit.¹¹ Et interrogabant eum, dicentes : Quid ergo dicunt pharisæi et scribæ, quia Eliam oportet venire primum ?¹² Qui respondens, ait illis : Elias cum venerit primo, restituet omnia : et quomodo scriptum est in Filium hominis, ut multa patiatur et contemnatur.¹³ Sed dico vobis quia et Elias venit (et fecerunt illi quæcumque voluerunt) sicut scriptum est de eo.¹⁴ Et veniens ad discipulos suos, vidit turbam magnam circa eos, et scribas conquirentes cum illis.¹⁵ Et confestim omnis populus videns Jesum, stupefactus est, et expaverunt, et accurrentes salutabant eum.¹⁶ Et interrogavit eos : Quid inter vos conquiritis ?¹⁷ Et respondens unus de turba, dixit : Magister, attuli filium meum ad te habentem spiritum mutum :

¹⁸ qui ubicumque eum apprehenderit, allidit illum, et spumat, et stridet dentibus, et arescit : et dixi discipulis tuis ut ejicerent illum, et non potuerunt.¹⁹ Qui respondens eis, dixit : O generatio incredula, quamdiu apud vos ero ? quamdiu vos patiar ? afferte illum ad me.²⁰ Et attulerunt eum. Et cum vidisset eum, statim spiritus conturbavit illum : et elisus in terram, volutabatur spumans.²¹ Et interrogavit patrem ejus : Quantum temporis est ex quo ei hoc accidit ? At ille ait : Ab infantia :²² et frequenter eum in ignem, et in aquas misit ut eum perderet : sed si quid potes, adjuva nos, misertus nostri.²³ Jesus autem ait illi : Si potes credere, omnia possibilia sunt credenti.²⁴ Et continuo exclamans pater pueri, cum lacrimis aiebat : Credo, Domine ; adjuva incredulitatem meam.²⁵ Et cum videret Jesus concurrentem turbam, comminatus est spiritui immundo, dicens illi : Surde et mute spiritus, ego præcipio tibi, exi ab eo : et amplius ne introëas in eum.²⁶ Et exclamans, et multum discerpens eum, exiit ab eo, et factus est sicut mortuus, ita ut multi dicerent : Quia mortuus est.²⁷ Jesus autem tenens manum ejus elevavit eum, et surrexit.

²⁸ Et cum introisset in domum, discipuli ejus secreto interrogabant eum : Quare nos non potuimus ejicere eum ?²⁹ Et dixit illis : Hoc genus in nullo potest exire, nisi in oratione et jejunio.³⁰ Et inde profecti prætergrediebantur Galilæam : nec volebat quemquam scire.³¹ Docebat autem discipulos suos, et dicebat illis : Quoniam Filius hominis tradetur in manus hominum, et occident eum, et occisus tertia die resurget.³² At illi ignorabant verbum : et timebant interrogare eum.³³ Et venerunt Capharnaum. Qui cum domi essent, interrogabat eos : Quid in via tractabatis ?³⁴ At illi tacebant : siquidem in via inter se disputaverunt : quis eorum major esset.³⁵ Et residens vocavit duodecim, et ait illis : Si quis vult primus esse, erit omnium novissimus, et omnium minister.³⁶ Et accipiens puerum, statuit eum in medio eorum : quem cum complexus esset, ait illis :

³⁷ Quisquis unum ex hujusmodi pueris receperit in nomine meo, me recipit : et quicumque me susceperit, non me suscipit, sed eum qui misit me.³⁸ Respondit illi Joannes, dicens : Magister, vidimus quemdam in nomine tuo ejicientem dæmonia, qui non sequitur nos, et prohibuimus eum.³⁹ Jesus autem ait : Nolite prohibere eum : nemo est enim qui faciat virtutem in nomine meo, et possit cito male loqui de me :⁴⁰ qui enim non est adversum vos, pro vobis est.⁴¹ Quisquis enim potum dederit vobis calicem aquæ in nomine meo, quia Christi estis : amen dico vobis, non perdet mercedem suam.⁴² Et quisquis scandalizaverit unum ex his pusillis credentibus in me : bonum est ei magis si circumdaretur mola asinaria collo ejus, et in mare mitteretur.

⁴³ Et si scandalizaverit te manus tua, abscide illam : bonum est tibi debilem introire in vitam, quam duas manus habentem ire in gehennam, in ignem inextinguibilem,⁴⁴ ubi vermis eorum non moritur, et ignis non extinguitur.⁴⁵ Et si pes tuus te scandalizat, amputa illum : bonum est tibi claudum introire in vitam æternam, quam duos pedes habentem mitti in gehennam ignis inextinguibilis,⁴⁶ ubi vermis eorum non moritur, et ignis non extinguitur.⁴⁷ Quod si oculus tuus scandalizat te, ejice eum : bonum est tibi luscum introire in regnum Dei, quam duos oculos habentem mitti in gehennam ignis,⁴⁸ ubi vermis eorum non moritur, et ignis non extinguitur.⁴⁹ Omnis enim igne salietur, et omnis victima sale salietur.⁵⁰ Bonum est sal : quod si sal insulsum fuerit, in quo illud condietis ? Habete in vobis sal, et pacem habete inter vos.

⁵¹ Factum est autem dum complerentur dies assumptionis ejus, et ipse faciem suam firmavit ut iret in Jerusalem.⁵² Et misit nuntios ante conspectum suum : et euntes intraverunt in civitatem Samaritanorum ut parerent illi.⁵³ Et non receperunt eum, quia facies ejus erat euntis in Jerusalem.⁵⁴ Cum vidissent autem discipuli ejus Jacobus et Joannes, dixerunt : Domine, vis dicimus ut ignis descendat de cælo, et consumat illos ?⁵⁵ Et conversus increpavit illos, dicens : Nescitis cujus spiritus estis.⁵⁶ Filius hominis non venit animas perdere, sed salvare. Et abierunt in aliud castellum.

⁵⁷ Factum est autem : ambulantibus illis in via, dixit quidam ad illum : Sequar te quocumque ieris.⁵⁸ Dixit illi Jesus : Vulpes foveas habent, et volucres cæli nidos : Filius autem hominis non habet ubi caput reclinet.⁵⁹ Ait autem ad alterum : Sequere me : ille autem dixit : Domine, permitte mihi primum ire, et sepelire patrem meum.⁶⁰ Dixitque ei Jesus : Sine ut mortui sepeliant mortuos suos : tu autem vade, et annuntia regnum Dei.⁶¹ Et ait alter : Sequar te Domine, sed permitte mihi primum renuntiare his quæ domi sunt.⁶² Ait ad illum Jesus : Nemo mittens manum suam ad aratrum, et respiciens retro, aptus est regno Dei.