Read the Bible

¹ Initium Evangelii Jesu Christi, Filii Dei.² Sicut scriptum est in Isaia propheta : Ecce ego mitto angelum meum ante faciem tuam, qui præparabit viam tuam ante te.³ Vox clamantis in deserto : Parate viam Domini, rectas facite semitas ejus.⁴ Fuit Joannes in deserto baptizans, et prædicans baptismum pÅ“nitentiæ in remissionem peccatorum.

⁵ Et egrediebatur ad eum omnis Judææ regio, et Jerosolymitæ universi, et baptizabantur ab illo in Jordanis flumine, confitentes peccata sua.⁶ Et erat Joannes vestitus pilis cameli, et zona pellicea circa lumbos ejus, et locustas et mel silvestre edebat.⁷ Et prædicabat dicens : Venit fortior post me, cujus non sum dignus procumbens solvere corrigiam calceamentorum ejus.⁸ Ego baptizavi vos aqua, ille vero baptizabit vos Spiritu Sancto.⁹ Et factum est : in diebus illis venit Jesus a Nazareth Galilææ : et baptizatus est a Joanne in Jordane.¹⁰ Et statim ascendens de aqua, vidit cælos apertos, et Spiritum tamquam columbam descendentem, et manentem in ipso.¹¹ Et vox facta est de cælis : Tu es Filius meus dilectus, in te complacui.¹² Et statim Spiritus expulit eum in desertum.¹³ Et erat in deserto quadraginta diebus, et quadraginta noctibus : et tentabatur a Satana : eratque cum bestiis, et angeli ministrabant illi.¹⁴ Postquam autem traditus est Joannes, venit Jesus in Galilæam, prædicans Evangelium regni Dei,¹⁵ et dicens : Quoniam impletum est tempus, et appropinquavit regnum Dei : pÅ“nitemini, et credite Evangelio.¹⁶ Et præteriens secus mare Galilææ, vidit Simonem, et Andream fratrem ejus, mittentes retia in mare (erant enim piscatores),¹⁷ et dixit eis Jesus : Venite post me, et faciam vos fieri piscatores hominum.¹⁸ Et protinus relictis retibus, secuti sunt eum.¹⁹ Et progressus inde pusillum, vidit Jacobum Zebedæi, et Joannem fratrem ejus, et ipsos componentes retia in navi :²⁰ et statim vocavit illos. Et relicto patre suo Zebedæo in navi cum mercenariis, secuti sunt eum.²¹ Et ingrediuntur Capharnaum : et statim sabbatis ingressus in synagogam, docebat eos.²² Et stupebant super doctrina ejus : erat enim docens eos quasi potestatem habens, et non sicut scribæ.²³ Et erat in synagoga eorum homo in spiritu immundo : et exclamavit,²⁴ dicens : Quid nobis et tibi, Jesu Nazarene ? venisti perdere nos ? scio qui sis, Sanctus Dei.²⁵ Et comminatus est ei Jesus, dicens : Obmutesce, et exi de homine.

²⁶ Et discerpens eum spiritus immundus, et exclamans voce magna, exiit ab eo.²⁷ Et mirati sunt omnes, ita ut conquirerent inter se dicentes : Quidnam est hoc ? quænam doctrina hæc nova ? quia in potestate etiam spiritibus immundis imperat, et obediunt ei.²⁸ Et processit rumor ejus statim in omnem regionem Galilææ.²⁹ Et protinus egredientes de synagoga, venerunt in domum Simonis et Andreæ, cum Jacobo et Joanne.³⁰ Decumbebat autem socrus Simonis febricitans : et statim dicunt ei de illa.³¹ Et accedens elevavit eam, apprehensa manu ejus : et continuo dimisit eam febris, et ministrabat eis.³² Vespere autem facto cum occidisset sol, afferebant ad eum omnes male habentes, et dæmonia habentes :³³ et erat omnis civitas congregata ad januam.³⁴ Et curavit multos, qui vexabantur variis languoribus, et dæmonia multa ejiciebat, et non sinebat ea loqui, quoniam sciebant eum.³⁵ Et diluculo valde surgens, egressus abiit in desertum locum, ibique orabat.³⁶ Et prosecutus est eum Simon, et qui cum illo erant.³⁷ Et cum invenissent eum, dixerunt ei : Quia omnes quærunt te.³⁸ Et ait illis : Eamus in proximos vicos, et civitates, ut et ibi prædicem : ad hoc enim veni.

³⁹ Et erat prædicans in synagogis eorum, et in omni Galilæa, et dæmonia ejiciens.⁴⁰ Et venit ad eum leprosus deprecans eum : et genu flexo dixit ei : Si vis, potes me mundare.⁴¹ Jesus autem misertus ejus, extendit manum suam : et tangens eum, ait illi : Volo : mundare.⁴² Et cum dixisset, statim discessit ab eo lepra, et mundatus est.⁴³ Et comminatus est ei, statimque ejecit illum,⁴⁴ et dicit ei : Vide nemini dixeris : sed vade, ostende te principi sacerdotum, et offer pro emundatione tua, quæ præcepit Moyses in testimonium illis.⁴⁵ At ille egressus cÅ“pit prædicare, et diffamare sermonem, ita ut jam non posset manifeste introire in civitatem, sed foris in desertis locis esset, et conveniebant ad eum undique.⁴⁶ Et ait Maria : Magnificat anima mea Dominum :⁴⁷ et exsultavit spiritus meus in Deo salutari meo.⁴⁸ Quia respexit humilitatem ancillæ suæ : ecce enim ex hoc beatam me dicent omnes generationes,⁴⁹ quia fecit mihi magna qui potens est : et sanctum nomen ejus,⁵⁰ et misericordia ejus a progenie in progenies timentibus eum.⁵¹ Fecit potentiam in brachio suo : dispersit superbos mente cordis sui.⁵² Deposuit potentes de sede, et exaltavit humiles.⁵³ Esurientes implevit bonis : et divites dimisit inanes.⁵⁴ Suscepit Israël puerum suum, recordatus misericordiæ suæ :⁵⁵ sicut locutus est ad patres nostros, Abraham et semini ejus in sæcula.⁵⁶ Mansit autem Maria cum illa quasi mensibus tribus : et reversa est in domum suam.

⁵⁷ Elisabeth autem impletum est tempus pariendi, et peperit filium.⁵⁸ Et audierunt vicini et cognati ejus quia magnificavit Dominus misericordiam suam cum illa, et congratulabantur ei.⁵⁹ Et factum est in die octavo, venerunt circumcidere puerum, et vocabant eum nomine patris sui Zachariam.⁶⁰ Et respondens mater ejus, dixit : Nequaquam, sed vocabitur Joannes.⁶¹ Et dixerunt ad illam : Quia nemo est in cognatione tua, qui vocetur hoc nomine.⁶² Innuebant autem patri ejus, quem vellet vocari eum.⁶³ Et postulans pugillarem scripsit, dicens : Joannes est nomen ejus. Et mirati sunt universi.⁶⁴ Apertum est autem illico os ejus, et lingua ejus, et loquebatur benedicens Deum.⁶⁵ Et factus est timor super omnes vicinos eorum : et super omnia montana Judææ divulgabantur omnia verba hæc :⁶⁶ et posuerunt omnes qui audierant in corde suo, dicentes : Quis, putas, puer iste erit ? etenim manus Domini erat cum illo.

⁶⁷ Et Zacharias pater ejus repletus est Spiritu Sancto : et prophetavit, dicens :⁶⁸ Benedictus Dominus Deus Israël, quia visitavit, et fecit redemptionem plebis suæ :⁶⁹ et erexit cornu salutis nobis in domo David pueri sui,⁷⁰ sicut locutum est per os sanctorum, qui a sæculo sunt, prophetarum ejus :⁷¹ salutem ex inimicis nostris, et de manu omnium qui oderunt nos :⁷² ad faciendam misericordiam cum patribus nostris : et memorari testamenti sui sancti :⁷³ jusjurandum, quod juravit ad Abraham patrem nostrum, daturum se nobis⁷⁴ ut sine timore, de manu inimicorum nostrorum liberati, serviamus illi⁷⁵ in sanctitate et justitia coram ipso, omnibus diebus nostris.⁷⁶ Et tu puer, propheta Altissimi vocaberis : præibis enim ante faciem Domini parare vias ejus,⁷⁷ ad dandam scientiam salutis plebi ejus in remissionem peccatorum eorum⁷⁸ per viscera misericordiæ Dei nostri, in quibus visitavit nos, oriens ex alto :⁷⁹ illuminare his qui in tenebris et in umbra mortis sedent : ad dirigendos pedes nostros in viam pacis.⁸⁰ Puer autem crescebat, et confortabatur spiritu : et erat in desertis usque in diem ostensionis suæ ad Israël.