Read the Bible

¹ Filii estote Domini Dei vestri : non vos incidetis, nec facietis calvitium super mortuo :² quoniam populus sanctus es Domino Deo tuo, et te elegit ut sis ei in populum peculiarem de cunctis gentibus, quæ sunt super terram.³ Ne comedatis quæ immunda sunt.⁴ Hoc est animal quod comedere debetis : bovem, et ovem, et capram,⁵ cervum et capream, bubalum, tragelaphum, pygargum, orygem, camelopardalum.

⁶ Omne animal, quod in duas partes findit ungulam, et ruminat, comedetis.⁷ De his autem, quæ ruminant, et ungulam non findunt, comedere non debetis, ut camelum, leporem, chÅ“rogryllum : hæc, quia ruminant et non dividunt ungulam, immunda erunt vobis.⁸ Sus quoque, quoniam dividat ungulam et non ruminat, immunda erit. Carnibus eorum non vescemini, et cadavera non tangetis.⁹ Hæc comedetis ex omnibus quæ morantur in aquis : quæ habent pinnulas et squamas, comedite :¹⁰ quæ absque pinnulis et squamis sunt, ne comedatis, quia immunda sunt.¹¹ Omnes aves mundas comedite.¹² Immundas ne comedatis : aquilam scilicet, et gryphem, et haliæetum,¹³ ixion et vulturem ac milvum juxta genus suum :¹⁴ et omne corvini generis,¹⁵ et struthionem, ac noctuam, et larum, atque accipitrem juxta genus suum :