Read the Bible

¹ Et factum est in diebus illis, convenerunt Philisthiim in pugnam : et egressus est Israël obviam Philisthiim in prælium, et castrametatus est juxta lapidem Adjutorii. Porro Philisthiim venerunt in Aphec,² et instruxerunt aciem contra Israël. Inito autem certamine, terga vertit Israël Philisthæis : et cæsa sunt in illo certamine passim per agros, quasi quatuor millia virorum.³ Et reversus est populus ad castra : dixeruntque majores natu de Israël : Quare percussit nos Dominus hodie coram Philisthiim ? Afferamus ad nos de Silo arcam fÅ“deris Domini, et veniat in medium nostri, ut salvet nos de manu inimicorum nostrorum.⁴ Misit ergo populus in Silo, et tulerunt inde arcam fÅ“deris Domini exercituum sedentis super cherubim : erantque duo filii Heli cum arca fÅ“deris Dei, Ophni et Phinees.⁵ Cumque venisset arca fÅ“deris Domini in castra, vociferatus est omnis Israël clamore grandi, et personuit terra.⁶ Et audierunt Philisthiim vocem clamoris, dixeruntque : Quænam est hæc vox clamoris magni in castris Hebræorum ? Et cognoverunt quod arca Domini venisset in castra.⁷ Timueruntque Philisthiim, dicentes : Venit Deus in castra. Et ingemuerunt, dicentes :⁸ Væ nobis : non enim fuit tanta exultatio heri et nudiustertius : væ nobis. Quis nos salvabit de manu deorum sublimium istorum ? hi sunt dii, qui percusserunt Ægyptum omni plaga in deserto.

⁹ Confortamini, et estote viri, Philisthiim : ne serviatis Hebræis, sicut et illi servierunt vobis : confortamini, et bellate.¹⁰ Pugnaverunt ergo Philisthiim, et cæsus est Israël, et fugit unusquisque in tabernaculum suum : et facta est plaga magna nimis : et ceciderunt de Israël triginta millia peditum.¹¹ Et arca Dei capta est : duo quoque filii Heli mortui sunt, Ophni et Phinees.¹² Currens autem vir de Benjamin ex acie, venit in Silo in die illa, scissa veste, et conspersus pulvere caput.