Read the Bible

¹ למנצח מזמור לדוד שיר לך דמיה תהלה אלהים בציון ולך ישלם נדר׃² שמע תפלה עדיך כל בשר יבאו׃³ דברי עונת גברו מני פשעינו אתה תכפרם׃⁴ אשרי תבחר ותקרב ישכן חצריך נשבעה בטוב ביתך קדש היכלך׃⁵ נוראות בצדק תעננו אלהי ישענו מבטח כל קצוי ארץ וים רחקים׃

⁶ מכין הרים בכחו נאזר בגבורה׃⁷ משביח שאון ימים שאון גליהם והמון לאמים׃⁸ וייראו ישבי קצות מאותתיך מוצאי בקר וערב תרנין׃⁹ פקדת הארץ ותשקקה רבת תעשרנה פלג אלהים מלא מים תכין דגנם כי כן תכינה׃¹⁰ תלמיה רוה נחת גדודיה ברביבים תמגגנה צמחה תברך׃¹¹ עטרת שנת טובתך ומעגליך ירעפון דשן׃¹² ירעפו נאות מדבר וגיל גבעות תחגרנה׃¹³ לבשו כרים הצאן ועמקים יעטפו בר יתרועעו אף ישירו׃