Read the Bible

¹ למנצח אל תשחת לדוד מכתם בשלח שאול וישמרו את הבית להמיתו הצילני מאיבי אלהי ממתקוממי תשגבני׃² הצילני מפעלי און ומאנשי דמים הושיעני׃³ כי הנה ארבו לנפשי יגורו עלי עזים לא פשעי ולא חטאתי יהוה׃⁴ בלי עון ירוצון ויכוננו עורה לקראתי וראה׃⁵ ואתה יהוה אלהים צבאות אלהי ישראל הקיצה לפקד כל הגוים אל תחן כל בגדי און סלה׃⁶ ישובו לערב יהמו ככלב ויסובבו עיר׃⁷ הנה יביעון בפיהם חרבות בשפתותיהם כי מי שמע׃

⁸ ואתה יהוה תשחק למו תלעג לכל גוים׃⁹ עזו אליך אשמרה כי אלהים משגבי׃¹⁰ אלהי חסדו יקדמני אלהים יראני בשררי׃¹¹ אל תהרגם פן ישכחו עמי הניעמו בחילך והורידמו מגננו אדני׃¹² חטאת פימו דבר שפתימו וילכדו בגאונם ומאלה ומכחש יספרו׃¹³ כלה בחמה כלה ואינמו וידעו כי אלהים משל ביעקב לאפסי הארץ סלה׃¹⁴ וישובו לערב יהמו ככלב ויסובבו עיר׃¹⁵ המה ינועון לאכל אם לא ישבעו וילינו׃¹⁶ ואני אשיר עזך וארנן לבקר חסדך כי היית משגב לי ומנוס ביום צר לי׃¹⁷ עזי אליך אזמרה כי אלהים משגבי אלהי חסדי׃