Read the Bible

¹ למנצח לבני קרח מזמור כל העמים תקעו כף הריעו לאלהים בקול רנה׃² כי יהוה עליון נורא מלך גדול על כל הארץ׃³ ידבר עמים תחתינו ולאמים תחת רגלינו׃⁴ יבחר לנו את נחלתנו את גאון יעקב אשר אהב סלה׃

⁵ עלה אלהים בתרועה יהוה בקול שופר׃⁶ זמרו אלהים זמרו זמרו למלכנו זמרו׃⁷ כי מלך כל הארץ אלהים זמרו משכיל׃⁸ מלך אלהים על גוים אלהים ישב על כסא קדשו׃⁹ נדיבי עמים נאספו עם אלהי אברהם כי לאלהים מגני ארץ מאד נעלה׃