Read the Bible

¹ למנצח על ששנים לבני קרח משכיל שיר ידידת רחש לבי דבר טוב אמר אני מעשי למלך לשוני עט סופר מהיר׃² יפיפית מבני אדם הוצק חן בשפתותיך על כן ברכך אלהים לעולם׃³ חגור חרבך על ירך גבור הודך והדרך׃⁴ והדרך צלח רכב על דבר אמת וענוה צדק ותורך נוראות ימינך׃⁵ חציך שנונים עמים תחתיך יפלו בלב אויבי המלך׃

⁶ כסאך אלהים עולם ועד שבט מישר שבט מלכותך׃⁷ אהבת צדק ותשנא רשע על כן משחך אלהים אלהיך שמן ששון מחבריך׃⁸ מר ואהלות קציעות כל בגדתיך מן היכלי שן מני שמחוך׃⁹ בנות מלכים ביקרותיך נצבה שגל לימינך בכתם אופיר׃

¹⁰ שמעי בת וראי והטי אזנך ושכחי עמך ובית אביך׃¹¹ ויתאו המלך יפיך כי הוא אדניך והשתחוי לו׃¹² ובת צר במנחה פניך יחלו עשירי עם׃¹³ כל כבודה בת מלך פנימה ממשבצות זהב לבושה׃¹⁴ לרקמות תובל למלך בתולות אחריה רעותיה מובאות לך׃¹⁵ תובלנה בשמחת וגיל תבאינה בהיכל מלך׃¹⁶ תחת אבתיך יהיו בניך תשיתמו לשרים בכל הארץ׃¹⁷ אזכירה שמך בכל דר ודר על כן עמים יהודך לעלם ועד׃