Read the Bible

¹ למנצח מזמור לדוד אשרי משכיל אל דל ביום רעה ימלטהו יהוה׃² יהוה ישמרהו ויחיהו יאשר בארץ ואל תתנהו בנפש איביו׃³ יהוה יסעדנו על ערש דוי כל משכבו הפכת בחליו׃⁴ אני אמרתי יהוה חנני רפאה נפשי כי חטאתי לך׃

⁵ אויבי יאמרו רע לי מתי ימות ואבד שמו׃⁶ ואם בא לראות שוא ידבר לבו יקבץ און לו יצא לחוץ ידבר׃⁷ יחד עלי יתלחשו כל שנאי עלי יחשבו רעה לי׃⁸ דבר בליעל יצוק בו ואשר שכב לא יוסיף לקום׃⁹ גם איש שלומי אשר בטחתי בו אוכל לחמי הגדיל עלי עקב׃¹⁰ ואתה יהוה חנני והקימני ואשלמה להם׃¹¹ בזאת ידעתי כי חפצת בי כי לא יריע איבי עלי׃¹² ואני בתמי תמכת בי ותציבני לפניך לעולם׃¹³ ברוך יהוה אלהי ישראל מהעולם ועד העולם אמן ואמן׃