Read the Bible

¹ מזמור לדוד הבו ליהוה בני אלים הבו ליהוה כבוד ועז׃² הבו ליהוה כבוד שמו השתחוו ליהוה בהדרת קדש׃³ קול יהוה על המים אל הכבוד הרעים יהוה על מים רבים׃⁴ קול יהוה בכח קול יהוה בהדר׃⁵ קול יהוה שבר ארזים וישבר יהוה את ארזי הלבנון׃⁶ וירקידם כמו עגל לבנון ושרין כמו בן ראמים׃⁷ קול יהוה חצב להבות אש׃⁸ קול יהוה יחיל מדבר יחיל יהוה מדבר קדש׃⁹ קול יהוה יחולל אילות ויחשף יערות ובהיכלו כלו אמר כבוד׃¹⁰ יהוה למבול ישב וישב יהוה מלך לעולם׃¹¹ יהוה עז לעמו יתן יהוה יברך את עמו בשלום׃