Read the Bible

¹ בני אם ערבת לרעך תקעת לזר כפיך׃² נוקשת באמרי פיך נלכדת באמרי פיך׃³ עשה זאת אפוא בני והנצל כי באת בכף רעך לך התרפס ורהב רעיך׃⁴ אל תתן שנה לעיניך ותנומה לעפעפיך׃⁵ הנצל כצבי מיד וכצפור מיד יקוש׃

⁶ לך אל נמלה עצל ראה דרכיה וחכם׃⁷ אשר אין לה קצין שטר ומשל׃⁸ תכין בקיץ לחמה אגרה בקציר מאכלה׃⁹ עד מתי עצל תשכב מתי תקום משנתך׃¹⁰ מעט שנות מעט תנומות מעט חבק ידים לשכב׃¹¹ ובא כמהלך ראשך ומחסרך כאיש מגן׃

¹² אדם בליעל איש און הולך עקשות פה׃¹³ קרץ בעינו מלל ברגלו מרה באצבעתיו׃¹⁴ תהפכות בלבו חרש רע בכל עת מדנים ישלח׃¹⁵ על כן פתאם יבוא אידו פתע ישבר ואין מרפא׃¹⁶ שש הנה שנא יהוה ושבע תועבות נפשו׃¹⁷ עינים רמות לשון שקר וידים שפכות דם נקי׃¹⁸ לב חרש מחשבות און רגלים ממהרות לרוץ לרעה׃¹⁹ יפיח כזבים עד שקר ומשלח מדנים בין אחים׃

²⁰ נצר בני מצות אביך ואל תטש תורת אמך׃²¹ קשרם על לבך תמיד ענדם על גרגרתך׃²² בהתהלכך תנחה אתך בשכבך תשמר עליך והקיצות היא תשיחך׃²³ כי נר מצוה ותורה אור ודרך חיים תוכחות מוסר׃²⁴ לשמרך מאשת רע מחלקת לשון נכריה׃²⁵ אל תחמד יפיה בלבבך ואל תקחך בעפעפיה׃²⁶ כי בעד אשה זונה עד ככר לחם ואשת איש נפש יקרה תצוד׃²⁷ היחתה איש אש בחיקו ובגדיו לא תשרפנה׃²⁸ אם יהלך איש על הגחלים ורגליו לא תכוינה׃²⁹ כן הבא אל אשת רעהו לא ינקה כל הנגע בה׃³⁰ לא יבוזו לגנב כי יגנוב למלא נפשו כי ירעב׃³¹ ונמצא ישלם שבעתים את כל הון ביתו יתן׃³² נאף אשה חסר לב משחית נפשו הוא יעשנה׃³³ נגע וקלון ימצא וחרפתו לא תמחה׃³⁴ כי קנאה חמת גבר ולא יחמול ביום נקם׃³⁵ לא ישא פני כל כפר ולא יאבה כי תרבה שחד׃