Read the Bible

¹ עלה מפיץ על פניך נצור מצרה צפה דרך חזק מתנים אמץ כח מאד׃² כי שב יהוה את גאון יעקב כגאון ישראל כי בקקום בקקים וזמריהם שחתו׃³ מגן גבריהו מאדם אנשי חיל מתלעים באש פלדות הרכב ביום הכינו והברשים הרעלו׃⁴ בחוצות יתהוללו הרכב ישתקשקון ברחבות מראיהן כלפידם כברקים ירוצצו׃⁵ יזכר אדיריו יכשלו בהלכותם ימהרו חומתה והכן הסכך׃⁶ שערי הנהרות נפתחו וההיכל נמוג׃⁷ והצב גלתה העלתה ואמהתיה מנהגות כקול יונים מתפפת על לבבהן׃⁸ ונינוה כברכת מים מימי היא והמה נסים עמדו עמדו ואין מפנה׃⁹ בזו כסף בזו זהב ואין קצה לתכונה כבד מכל כלי חמדה׃¹⁰ בוקה ומבוקה ומבלקה ולב נמס ופק ברכים וחלחלה בכל מתנים ופני כלם קבצו פארור׃

¹¹ איה מעון אריות ומרעה הוא לכפרים אשר הלך אריה לביא שם גור אריה ואין מחריד׃¹² אריה טרף בדי גרותיו ומחנק ללבאתיו וימלא טרף חריו ומענתיו טרפה׃¹³ הנני אליך נאם יהוה צבאות והבערתי בעשן רכבה וכפיריך תאכל חרב והכרתי מארץ טרפך ולא ישמע עוד קול מלאככה׃