Read the Bible

¹ אז באו אל ישוע הסופרים והפרושים אשר מירושלים׃² ויאמרו מדוע תלמידיך עברים את קבלת הזקנים כי אינם רחצים את ידיהם באכלם לחם׃³ ויען ויאמר אליהם מדוע גם אתם עברים את מצות אלהים בעבור קבלתכם׃⁴ כי אלהים צוה לאמר כבד את אביך ואת אמך ומקלל אביו ואמו מות יומת׃⁵ ואתם אמרים האמר לאביו ולאמו קרבן כל מה שאתה נהנה לי אין עליו לכבד את אביו ואת אמו׃⁶ ותפרו את דבר האלהים בעבור קבלתכם׃⁷ חנפים היטב נבא עליכם ישעיהו לאמר׃⁸ העם הזה נגש בפיו ובשפתיו כבדוני ולבו רחק ממני׃⁹ ותהו יראתם אתי מצות אנשים מלמדים׃

¹⁰ ויקרא אל העם ויאמר להם שמעו והבינו׃¹¹ לא הבא אל הפה יטמא את האדם כי אם היוצא מן הפה הוא מטמא את האדם׃¹² ויגשו אליו תלמידיו ויאמרו הידעת כי הפרושים בשמעם את הדבר הזה נכשלו בו׃¹³ ויען ויאמר כל מטע אשר לא נטע אבי שבשמים עקור יעקר׃¹⁴ הניחו אותם מנהלים עורים המה לעורים וכי יוליך עור את העור ונפלו שניהם בתוך הבור׃¹⁵ ויען פטרוס ויאמר אליו באר לנו את המשל הזה׃¹⁶ ויאמר ישוע עדנה גם אתם באין בינה׃¹⁷ העוד לא תשכילו כי כל הבא אל הפה יורד אל הכרש וישפך משם למוצאות׃¹⁸ אבל היוצא מן הפה יוצא מן הלב והוא מטמא את האדם׃¹⁹ כי מן הלב יוצאות מחשבות רע רציחות נאופים זנונים גנבות עדיות שקר וגדופים׃²⁰ אלה הם המטמאים את האדם אבל אכול בלי נטילת ידים לא יטמא את האדם׃

²¹ ויצא ישוע משם ויסר אל גלילות צור וצידון׃²² והנה אשה כנענית יצאה מן הגבולות ההם ותצעק אליו לאמר חנני אדני בן דוד כי בתי מענה מאד על ידי שד׃²³ והוא לא ענה אתה דבר ויגשו תלמידיו ויבקשו ממנו לאמר שלחה כי צעקת היא אחרינו׃²⁴ ויען ויאמר לא שלחתי כי אם אל הצאן האבדות לבית ישראל׃²⁵ והיא באה ותשתחו לו לאמר אדני עזרני׃²⁶ ויען ויאמר לא טוב לקחת את לחם הבנים ולהשליכו לצעירי הכלבים׃²⁷ ותאמר כן אדני אפס כי גם צעירי הכלבים יאכלו מפרורים הנפלים מעל שלחן אדניהם׃²⁸ ויען ישוע ויאמר אליה אשה גדלה אמונתך יהי לך כרצונך ותרפא בתה מן השעה ההיא׃

²⁹ ויעבר ישוע משם ויבא אל ים הגליל ויעל ההרה וישב שם׃³⁰ ויבאו אליו המון עם רב ועמהם פסחים עורים חרשים קטעים ורבים כהמה ויפילום לרגלי ישוע וירפאם׃³¹ ויתמהו העם בראותם את האלמים מדברים והקטעים בריאים והפסחים מתהלכים והעורים ראים וישבחו את אלהי ישראל׃³² ויקרא ישוע אל תלמידיו ויאמר נכמרו רחמי על העם כי זה שלשת ימים עמדו עמדי ואין להם מה לאכל ואינני אבה לשלחם רעבים פן יתעלפו בדרך׃³³ ויאמרו אליו התלמידים מאין לנו די לחם במדבר להשביע את ההמון הגדול הזה׃³⁴ ויאמר ישוע אליהם כמה ככרות לחם לכם ויאמרו שבע ומעט דגים קטנים׃³⁵ ויצו את המון העם לשבת לארץ׃³⁶ ויקח את שבע ככרות הלחם ואת הדגים ויברך ויפרס ויתן אל התלמידים והתלמידים נתנו לעם׃³⁷ ויאכלו כלם וישבעו וישאו מן הפתותים הנותרים שבעה דודים מלאים׃³⁸ והאכלים היו ארבעת אלפי איש מלבד הנשים והטף׃³⁹ וישלח את העם וירד באניה ויבא אל גבול מגדלא׃