Read the Bible

¹ ויבאו אל עבר הים אל ארץ הגדרים׃² והוא יצא מן האניה והנה איש בא לקראתו מבין הקברים אשר רוח טמאה בו׃³ ומושבו בקברים וגם בעבתים לא יכל איש לאסרו׃⁴ כי פעמים הרבה אסרוהו בכבלים ובעבתים וינתק את העבתים וישבר את הכבלים ואין איש יכל לכבשו׃⁵ ותמיד לילה ויומם היה בהרים ובקברים צעק ופצע את עצמו באבנים׃⁶ ויהי כראותו את ישוע מרחוק וירץ וישתחו לו׃⁷ ויצעק בקול גדול ויאמר מה לי ולך ישוע בן אל עליון באלהים אני משביעך אשר לא תענני׃⁸ כי הוא אמר אליו צא רוח טמא מן האדם הזה׃⁹ וישאל אתו מה שמך ויען ויאמר לגיון שמי כי רבים אנחנו׃¹⁰ ויתחנן אליו מאד לבלתי שלחם אל מחוץ לארץ׃¹¹ ועדר חזירים רבים היה שם במרעה ההרים׃¹² ויתחננו לו כל השדים לאמר שלחנו אל החזירים ונבאה אל תוכם׃¹³ וינח להם ויצאו רוחות הטמאה ויבאו בחזירים וישתער העדר מן המורד אל הים כאלפים במספר ויטבעו בים׃¹⁴ וינוסו רעי החזירים ויגידו זאת בעיר ובשדות ויצאו לראות מה נהיתה׃¹⁵ ויבאו אל ישוע ויראו את אחוז השדים אשר הלגיון בו והוא יושב מלבש וטוב שכל וייראו׃¹⁶ ויספרו להם הראים את אשר נעשה לאחוז השדים ואת דבר החזירים׃¹⁷ ויחלו להתחנן לו לסור מגבוליהם׃¹⁸ ויהי ברדתו אל האניה התחנן אליו האיש אשר היה אחוז שדים לתתו לשבת עמו׃¹⁹ ולא הניח לו כי אם אמר אליו שוב לביתך אל בני משפחתך והגד להם את הגדלות אשר עשה לך יהוה ויחנך׃²⁰ וילך לו ויחל לקרא בעשר הערים את הגדלות אשר עשה לו ישוע ויתמהו כלם׃

²¹ וישב ישוע לעבר באניה אל עבר הים ויקהל אליו המון רב והוא על שפת הים׃²² והנה בא אחד מראשי הכנסת ושמו יאיר וירא אתו ויפל לרגליו׃²³ ויתחנן אליו מאד לאמר בתי הקטנה חלתה עד למות אנא בוא נא ושים ידיך עליה למען תרפא ותחיה׃²⁴ וילך אתו וילכו אחריו המון רב וידחקהו׃²⁵ ואשה היתה זבת דם שתים עשרה שנה׃²⁶ והיא סבלה הרבה תחת ידי רפאים רבים והוציאה את כל אשר לה ולא להועיל ויהי חליה חזק מאד׃²⁷ ויהי כשמעה את שמע ישוע ותבוא בהמון העם מאחריו ותגע בבגדו׃²⁸ כי אמרה רק אם אגע בבגדיו אושע׃²⁹ וייבש מקור דמיה פתאם ותבן בבשרה כי נרפא נגעה׃³⁰ וברגע ידע ישוע בנפשו כי גבורה יצאה ממנו ויפן בתוך העם ויאמר מי נגע בבגדי׃³¹ ויאמר אליו תלמידיו אתה ראה את ההמון דוחק אתך ואמרת מי נגע בי׃³² ויבט סביב לראות את אשר עשתה זאת׃³³ ותירא האשה ותחרד כי ידעה את אשר נעשה לה ותבא ותפל לפניו ותגד לו את האמת כלה׃³⁴ ויאמר אליה בתי אמונתך הושיעה לך לכי לשלום וחיית מנגעך׃

³⁵ עודנו מדבר והנה באים מבית ראש הכנסת לאמר בתך מתה למה תטריח עוד את המורה׃³⁶ וכשמע ישוע את הדבר אשר דברו ויאמר אל ראש הכנסת אל תירא רק האמינה׃³⁷ ולא הניח לאיש ללכת אתו בלתי אם לפטרוס וליעקב וליוחנן אחי יעקב׃³⁸ ויבא בית ראש הכנסת וירא המון הבכים והמיללים הרבה׃³⁹ ובבאו אמר אליהם מה תהמו ותבכו הנערה לא מתה אך ישנה היא׃⁴⁰ וישחקו לו והוא גרש את כלם ויקח את אבי הנערה ואת אמה ואת אשר אתו ויבא החדרה אשר שם שכבת הנערה׃⁴¹ ויאחז ביד הנערה ויאמר אליה טליתא קומי אשר פרושו הילדה אני אמר לך קומי נא׃⁴² ומיד קמה הילדה ותתהלך והיא בת שתים עשרה שנה וישמו שמה גדולה׃⁴³ ויזהר אותם מאד שלא יודע הדבר לאיש ויאמר לתת לה לאכול׃