Read the Bible

¹ ויהי כאשר קרבו לירושלים אל בית פגי ובית היני בהר הזיתים וישלח שנים מתלמידיו׃² ויאמר אליהם לכו אל הכפר אשר ממולכם והיה כבאכם שמה תמצאו עיר אסור אשר לא ישב עליו אדם אותו התירו והביאו׃³ וכי יאמר אליכם איש למה תעשו זאת ואמרתם האדון צריך לו וברגע ישלחנו הנה׃⁴ וילכו וימצאו העיר אסור אל השער בחוץ על אם הדרך ויתירוהו׃⁵ ואנשים מן העמדים שם אמרו אליהם מה זאת תעשו להתיר את העיר׃⁶ ויאמרו אליהם כאשר צום ישוע ויניחו להם׃⁷ ויביאו את העיר אל ישוע וישליכו עליו את בגדיהם וישב עליו׃⁸ ורבים פרשו את בגדיהם על הדרך ואחרים כרתו ענפים מן העצים וישטחו על הדרך׃⁹ וההלכים לפניו ואחריו צעקים לאמר הושע נא ברוך הבא בשם יהוה׃¹⁰ ברוכה מלכות דוד אבינו הבאה בשם יהוה הושע נא במרומים׃¹¹ ויבא ישוע ירושלים ואל בית המקדש וירא ויתבונן על הכל והיום רפה לערוב ויצא אל בית היני עם שנים העשר׃

¹² ויהי ממחרת בצאתם מבית היני וירעב׃¹³ וירא תאנה מרחוק ולא עלים ויבא לראות הימצא בה פרי ויקרב אליה ולא מצא בה כי אם עלים לבד כי לא היתה עת תאנים׃¹⁴ ויען ויאמר אליה מעתה איש אל יאכל פרי ממך עד עולם וישמעו תלמידיו׃¹⁵ ויבאו ירושלים ויבא ישוע אל המקדש ויחל לגרש משם את המוכרים ואת הקונים ויהפך את שלחנות השלחנים ואת מושבות מכרי היונים׃¹⁶ ולא הניח לאיש לשאת כלי דרך המקדש׃¹⁷ וילמד ויאמר להם הלא כתוב כי ביתי בית תפלה יקרא לכל העמים ואתם עשיתם אתו מערת פריאים׃¹⁸ וישמעו הסופרים וראשי הכהנים ויתנכלו אתו להשמידו כי יראו מפניו יען אשר כל העם משתוממים על תורתו׃¹⁹ ויהי בערב ויצא אל מחוץ לעיר׃²⁰ ויהי הם עברים בבקר ויראו את התאנה כי יבשה עם שרשיה׃²¹ ויזכר פטרוס ויאמר אליו רבי הנה התאנה אשר אררתה יבשה׃²² ויען ישוע ויאמר אליהם תהי נא בכם אמונת אלהים׃²³ כי אמן אמר אני לכם כל אשר יאמר אל ההר הזה הנשא והעתק אל תוך הים ואין ספק בלבבו כי אם יאמין כי יהיה כאשר אמר כן גם יהיה לו׃²⁴ על כן אני אמר לכם כל אשר תשאלו בהתפללכם האמינו כי תקחו ויהי לכם׃²⁵ וכי תעמדו להתפלל תסלחו לכל איש את אשר בלבבכם עליו למען יסלח לכם אביכם שבשמים אף הוא את פשעיכם׃²⁶ ואתם אם לא תסלחו אף אביכם שבשמים לא יסלח לכם את פשעיכם׃

²⁷ וישובו ויבאו ירושלים ויהי הוא מתהלך במקדש ויבאו אליו הכהנים הגדולים והסופרים והזקנים׃²⁸ ויאמרו אליו באי זו רשות אתה עשה אלה ומי נתן לך את הרשות הזאת לעשות את אלה׃²⁹ ויאמר ישוע אליהם גם אני אשאלה אתכם דבר אחד ואתם השיבוני ואמר לכם באי זו רשות אני עשה אלה׃³⁰ טבילת יוחנן המן השמים היתה אם מבני אדם השיבוני׃³¹ ויחשבו כה וכה בקרבם לאמר אם נאמר מן השמים יאמר מדוע אפוא לא האמנתם לו׃³² או הנאמר מבני אדם וייראו את העם כי כלם חשבו את יוחנן לנביא באמת׃³³ ויענו ויאמרו אל ישוע לא ידענו ויען ישוע ויאמר אליהם אם כן גם אני לא אמר לכם באי זו רשות אני עשה אלה׃