Read the Bible

¹ ויהי בקרב אליו כל המוכסים והחטאים לשמע אותו׃² וילונו הפרושים והסופרים לאמר הנה זה מקבל את החטאים ואכל אתם׃³ וידבר אליהם את המשל הזה לאמר׃⁴ מי זה האיש מכם אשר לו מאה כבשים ואבד לו אחד מהם ולא יטוש את התשעים ותשעה במדבר והלך אחרי האבד עד כי ימצאהו׃⁵ והיה כמצאו אתו ישימנו על כתפיו בשמחה׃⁶ ובא אל ביתו וקרא לאהביו ולשכניו יחד לאמר שמחו אתי כי מצאתי את שיי האבד׃⁷ אני אמר לכם כי כן תהיה שמחה בשמים על חוטא אחד השב יותר מעל תשעים ותשעה צדיקים אשר לא יצטרכו לתשובה׃⁸ או מי האשה אשר לה עשרה דרכמונים ואבד לה דרכמון אחד ולא תדליק נר ותטאטא את הבית ותחפש היטב עד כי תמצאהו׃⁹ והיה כמצאה אותו תקרא לרעותיה ולשכנותיה לאמר שמחנה אתי כי מצאתי את הדרכמון אשר אבד לי׃¹⁰ כן אני אמר לכם תהיה שמחה לנפי מלאכי אלהים על חוטא אחד אשר שב מחטאו׃

¹¹ ויאמר איש אחד היו לו שני בנים׃¹² ויאמר הצעיר אל אביו אבי תנה לי את חלק הרכוש אשר יפל לי ויחלק להם את הנחלה׃¹³ ויהי מקץ ימים ויאסף הבן הצעיר את הכל וילך אל ארץ רחוקה ושם פזר את רכשו וילך בדרך סובאים וזוללים׃¹⁴ ואחרי כלותו את הכל היה רעב חזק בארץ ההיא ויחל להיות חסר לחם׃¹⁵ וילך וידבק באחד מבני המדינה בארץ ההיא וישלח אותו אל שדותיו לרעות חזירים׃¹⁶ ויתאו למלא את בטנו בחרובים אשר יאכלו החזירים ואין נתן לו׃¹⁷ וישב אל לבו ויאמר מה רבו שכירי אבי ויש להם לחם לשבע ואני אבד ברעב׃¹⁸ אקומה נא ואלכה אל אבי ואמר אליו אבי חטאתי לשמים ולפניך׃¹⁹ ונקלתי מהקרא עוד בנך שימני כאשר שכיריך׃²⁰ ויקם ויבא אל אביו עודנו מרחוק ואביו ראהו ויהמו מעיו וירץ ויפל על צואריו וישקהו׃²¹ ויאמר אליו הבן אבי חטאתי לשמים ולפניך ואני נקלתי מהקרא עוד בנך׃²² ויאמר האב אל עבדיו הוציאו את השמלה הטובה מכלן והלבישהו ותנו טבעת על ידו ונעלים ברגליו׃²³ והביאו את עגל המרבק וטבחו אתו ונאכלה ונשמח׃²⁴ כי זה בני היה מת ויחי ואובד היה וימצא ויחלו לשמח׃²⁵ ובנו הגדול היה בשדה ויהי כאשר בא ויקרב אל הבית וישמע קול זמרה ומחלות׃²⁶ ויקרא אל אחד הנערים וישאל מה זאת׃²⁷ ויאמר אליו כי בא אחיך ויטבח אביך את עגל המרבק על אשר הושב לו שלם׃²⁸ ויחר לו ולא אבה לבוא הביתה ויצא אביו וידבר על לבו׃²⁹ ויען ויאמר אל אביו הנה זה שנים רבות אני עבד אתך ומימי לא עברתי את מצותך ומימי לא נתת לי גדי למען אשיש עם רעי׃³⁰ ויבא בנך זה אשר בלע את נחלתך עם הזנות ותזבח לו את עגל המרבק׃³¹ ויאמר אליו בני אתה תמיד עמדי וכל אשר לי לך הוא׃³² אבל נכון לשוש ולשמח כי אחיך זה היה מת ויחי ואבד היה וימצא׃