Read the Bible

¹ לכן גם אנחנו אשר ענן עדים רב כזה סבב אתנו נשליכה ממנו כל טרח והחטא המקיף עלינו ונרוצה בתוחלת את המרוצה הערוכה לפנינו׃² ונביטה אל ישוע ראש האמונה ומשלימה אשר בעד השמחה השמורה לו סבל את הצלב ויבז החרפה וישב לימין כסא האלהים׃³ התבוננו אליו אשר נשא כלמת חטאים גדולה כזאת למען לא תיעפו ולא תיגעו בנפשותיכם׃

⁴ עדין לא עמדתם עד לדם במלחמתכם עם החטא׃⁵ ותשכחו דבר הנחומים המדבר אליכם כמו אל בנים לאמר מוסר יהוה בני אל תמאס ואל תקץ בתוכחתו׃⁶ כי את אשר יאהב יהוה יוכיח יכאב את בן ירצה׃⁷ אם סבלים אתם מוסר דעו כי כאב עם בניו כן מתנהג אלהים עמכם כי איה הבן אשר אביו לא ייסרנו׃⁸ אך אם תהיו באין מוסר אשר היה מנת כלם אז ממזרים אתם ולא בנים׃⁹ ועוד אם אבות בשרנו היו מיסרים אתנו ונירא מהם אף כי נכנע לפני אבי הרוחות ונחיה׃¹⁰ כי המה יסרונו כטוב בעיניהם לימים מעטים אבל זה להועיל למען יהיה לנו חלק בקדשתו׃¹¹ וכל מוסר בעת עברו עלינו איננו שמחה בעינינו כי אם יגון אולם באחריתו יתן פרי שלום לצדקה למלמדים בו׃¹² על כן חזקו ידים רפות וברכים כשלות׃¹³ ומעגל רגליכם פלסו למען לא תטה הצלעה מן הדרך כי אם תרפא׃¹⁴ רדפו את השלום עם כל אדם ואת הקדשה אשר בלעדיה לא יראה איש את האדון׃¹⁵ והזהרו פן יש בכם איש מתאחר מחסד אלהים פן יוגיעכם שרש פרה לענה ויטמאו בו רבים׃¹⁶ פן ימצא בכם זנה או חלל כעשו אשר בנזיד אחד מכר את בכורתו׃¹⁷ הלא ידעתם כי גם נמאס אחרי כן כאשר רצה לרשת את הברכה כי לא מצא מקום לתשובה אף בקש אותה בדמעות׃

¹⁸ כי לא באתם אל הר נמשש ובער באש ולא אל ענן וערפל וסערה׃¹⁹ ולא לקול שופר ולקול הדברים אשר שמעיו בקשו שלא יוסיף לדבר עמהם עוד׃²⁰ כי לא יכלו לשאת את אשר צוו ואם בהמה תגע בהר סקל תקסל או ירה תירה בחצים׃²¹ והמראה היה נורא עד מאד ויאמר משה יגרתי וחרדתי׃²² כי אם באתם אל הר ציון ואל עיר אלהים חיים אל ירושלים שבשמים׃²³ ואל עצרת רבבות המלאכים ועדת הבכורים הכתובים בשמים ואל אלהים שפט הכל ואל רוחות הצדיקים הנשלמים׃²⁴ ואל ישוע סרסר הברית החדשה ואל דם ההזאה המיטיב דבר מדם הבל׃²⁵ לכן ראו פן תמאנו לשמע אל המדבר כי הן לא נמלטו המאנים לשמע אל המדבר עמהם בארץ אף אנחנו אם נמאן לשמע בקול המדבר מן השמים׃²⁶ אשר קולו הרעיש אז את הארץ ועתה זה הבטיח לאמר עוד אחת ואני מרעיש לא לבד את הארץ כי גם את השמים׃²⁷ וזו עוד אחת שאמר משמיע חליפת הנרעשים אשר הם עשוים למען יעמד אשר איננו נרעש׃²⁸ לכן אנחנו המקבלים מלכות אשר לא תמוט נבאה נא בתודה ונעבד בה את האלהים לרצון לו בצניעות וביראה׃²⁹ כי אלהינו אש אכלה הוא׃