Read the Bible

¹ ושאול עודנו יפח זעם ורצח על תלמידי האדון ויבא אל הכהן הגדול׃² וישאל מאתו מכתבים לדמשק אל בתי הכנסיות למען אשר יאסר את אשר ימצא בדרך ההיא אנשים או נשים ויביאם ירושלים׃³ ויהי הוא הלך וקרב לדמשק והנה פתאם נגה עליו מסביב אור מן השמים׃⁴ ויפל ארצה וישמע קול מדבר אליו שאול שאול למה תרדפני׃⁵ ויאמר מי אתה אדני ויאמר האדון אנכי ישוע אשר אתה רודף קשה לך לבעט בדרבנות׃⁶ והוא חרד ונבעת ויאמר אדני מה תחפץ ואעשה ויען האדון קום לך העירה ויאמר לך את אשר עליך לעשות׃⁷ והאנשים אשר הלכו אתו עמדו נאלמים כי שמעו את הקול ואיש לא הביטו׃⁸ ויקם שאול מן הארץ ובפתחו את עיניו לא ראה איש ויחזיקו בידו ויוליכהו לדמשק׃⁹ ויחשכו עיניו מראות שלשת ימים ולא אכל ולא שתה׃

¹⁰ ותלמיד אחד היה בדמשק חנניה שמו ויאמר אליו האדון במחזה חנניה ויאמר הנני אדני׃¹¹ ויאמר אליו האדון קום לך אל הרחוב הנקרא הישר ושאל בבית יהודה לאיש טרסי ושמו שאול כי הנה הוא מתפלל׃¹² וירא במחזה והנה איש ושמו חנניה בא החדרה ושם עליו את ידו למען ישוב ויראה׃¹³ ויען חנניה ויאמר אדני שמעתי רבים מספרים על האיש הזה כמה רעות עשה לקדושיך בירושלים׃¹⁴ וגם פה רשיון יש לו מאת ראשי הכהנים לאסר את כל הקראים בשמך׃¹⁵ ויאמר אליו האדון לך כי כלי חפץ הוא לי לשאת את שמי לפני גוים ומלכים ולפני בני ישראל׃¹⁶ כי אני אראהו כמה יש לו לסבל למען שמי׃¹⁷ וילך חנניה ויבא הביתה וישם את ידיו עליו ויאמר שאול אחי האדון ישוע הנראה אליך בדרך אשר באת בה שלחני למען תשוב ותראה ותמלא רוח הקדש׃¹⁸ וכרגע נפלו מעל עיניו כמו קשקשים וישב פתאם לראות ויקם ויטבל׃¹⁹ ויאכל לחם ויחזק וישב שאול ימים אחדים עם התלמידים אשר בדמשק׃²⁰ וימהר ויקרא בבתי הכנסיות את המשיח לאמר כי הוא הוא בן האלהים׃²¹ וישתוממו כל השמעים ויאמרו הלא זה הוא אשר האביד בירושלים את קראי השם הזה ולמען זאת בא הנה להביאם אסורים לפני ראשי הכהנים׃²² ושאול היה הולך וחזק ויהם את היהודים ישבי דמשק בהוכיחו כי זה הוא המשיח׃

²³ ויהי כי ארכו לו שם הימים ויועצו היהודים יחדו להמיתו׃²⁴ ויודע לשאול ארבם והמה שמרו את השערים יומם ולילה למען ימיתהו׃²⁵ ויקחו אתו התלמידים לילה ויורידהו בסל בעד החומה׃²⁶ ויהי כבוא שאול ירושלימה ויבקש להלות אל התלמידים וייראו כלם מפניו ולא האמינו כי תלמיד הוא׃²⁷ ויקח אתו בר נבא ויביאהו אל השליחים ויספר להם את אשר ראה בדרך את האדון וכי הוא דבר אליו ואיך בדמשק השמיע בבטחון את שם ישוע׃²⁸ ויהי אתם יוצא ובא בירושלים׃²⁹ ויקרא בבטחון בשם האדון ישוע וידבר ויתוכח גם עם היהודים היונים והם זממו להמיתו׃³⁰ וישמעו האחים ויורידו אתו לקסרין וישלחהו אל טרסוס׃³¹ ויהי שלום לקהלות בכל מקמות יהודה והגליל ושמרון ותבנינה ותתהלכנה ביראת האדון ותרבינה בנחמת רוח הקדש׃

³² ויהי בסבב פטרוס בכל המקמות וירד גם אל הקדושים אשר ישבו בלד׃³³ וימצא שם איש שמו אניס והוא שכב על משכבו זה שמנה שנים והוא נכה אברים׃³⁴ ויאמר אליו פטרוס אניס רפאך ישוע המשיח קום הצע לך אתה ויקם פתאם׃³⁵ ויראו אותו כל ישבי לד והשרון ויפנו אל האדון׃

³⁶ ותלמידה ביפו ושמה טביתא תרגומו צביה והיא מלאה מעשים טובים וצדקות אשר עשתה׃³⁷ ויהי בימים ההם ותחלה ותמת וירחצו אתה וישימוה בעליה׃³⁸ ולד קרובה היא ליפו וישמעו התלמידים כי פטרוס שם וישלחו אליו שני אנשים ויפצרו בו לבלתי העצל לעבר אליהם׃³⁹ ויקם פטרוס וילך אתם ובבאו העלהו אל העליה ותנשנה אליו כל האלמנות בוכיות ומראות לו את הכתנת ואת הבגדים אשר עשתה צביה בעודה עמהן׃⁴⁰ ויוצא פטרוס את כלם החוצה ויכרע על ברכיו ויתפלל ויפן אל גויתה ויאמר טביתא קומי ותפתח את עיניה ותרא את פטרוס ותתעודד׃⁴¹ וישלח ידו ויקם אתה ויקרא את הקדושים ואת האלמנות ויעמד אתה חיה לפניהם׃⁴² ויודע הדבר בכל יפו ויאמינו רבים באדון׃⁴³ ויואל לשבת ביפו ימים רבים עם בורסי אחד ושמו שמעון׃