Read the Bible

¹ ויהי בדברם אל העם ויקומו עליהם הכהנים ונגיד בית המקדש והצדוקים׃² כי חרה להם על אשר למדו את העם והגידו בישוע את תחית המתים׃³ וישלחו בהם את ידיהם וישימום במשמר עד למחר כי כבר בא הערב׃⁴ ורבים מהשמעים את הדבר האמינו ויהי מספר האנשים כחמשת אלפים׃

⁵ ויהי ממחרת ויקהלו שריהם ראשיהם וזקניהם וסופריהם ירושלים׃⁶ וחנן הכהן הגדול וקיפא ויוחנן ואלכסנדרוס וכל אשר ממשפחת הכהן הגדול׃⁷ ויעמידו אתם בתוך וישאלום באי זה כח ובאי זה שם עשיתם זאת׃⁸ וימלא פטרוס רוח הקדש ויאמר אליהם אתם ראשי העם וזקני ישראל׃⁹ אם אנחנו נחקרים היום על הטובה אשר עשינו לאיש חולה ושאלתם במה זה נושע׃¹⁰ יודע לכלכם ולכל עם ישראל כי בשם ישוע המשיח הנצרי אשר צלבתם אותו ואשר האלהים הקימו מן המתים כי בשמו עמד זה לפניכם בריא׃¹¹ והוא האבן אשר מאסתם אתם הבונים ותהי לראש פנה׃¹² ואין הישועה באחר ואין תחת השמים שם אחר הנתן לבני אדם אשר בו נושע׃¹³ ויהי כאשר ראו את בטחון לב של פטרוס ויוחנן והבינו כי הדיוטים ולא בעלי חכמה המה ויתמהו עליהם ויכירום כי התהלכו עם ישוע׃¹⁴ ובראותם את האיש הנרפא עמד אצלם לא מצאו לדבר נגדם דבר׃

¹⁵ ויצוו אתם לצאת חוצה מן הסנהדרין ויתיעצו יחדו׃¹⁶ ויאמרו מה נעשה לאנשים האלה הנה אות גלוי נעשה על ידיהם וגם מפרסם לכל ישבי ירושלים ולא נוכל לכחש בו׃¹⁷ אך למען לא ירבה הדבר בעם ויפרץ נזהירה אתם בגערה לבלתי דבר עוד לכל אדם בשם הזה׃¹⁸ ויקראו אתם ויצוום אשר לא ידברו דבר ולא ילמדו בשם ישוע׃¹⁹ ויענו פטרוס ויוחנן ויאמרו אליהם הנכון הוא לפני האלהים שמע לכם יתר משמע לאלהים שפטו אתם׃²⁰ כי לא נוכל אנחנו לחדל מדבר את אשר ראינו ושמענו׃²¹ ויוסיפו לגער בם ויפטרו אתם באשר לא מצאו דבר לענוש אתם מפני העם כי כלם מהללים את האלהים על הנעשה׃²² כי בן ארבעים שנה ומעלה היה האיש ההוא אשר נעשה עמו אות הרפואה הזאת׃

²³ ואחרי הפטרם באו אל אחיהם ויספרו להם את אשר אמרו אליהם הכהנים הגדולים והזקנים׃²⁴ ויהי כאשר שמעו את זאת וישאו את קולם בלב אחד לאלהים ויאמרו אדני אתה האל העשה את השמים ואת הארץ ואת הים ואת כל אשר בם׃²⁵ אשר אמרת בפי עבדך דוד למה רגשו גוים ולאמים יהגו ריק׃²⁶ יתיצבו מלכי ארץ ורוזנים נוסדו יחד על יהוה ועל משיחו׃²⁷ כי אמנם נוסדו הורדוס ופנטיוס פילטוס עם הגוים ולאמי ישראל על ישוע עבדך הקדוש אשר משחת׃²⁸ לעשות את אשר ידך ועצתך מקדם גזרה להיות׃²⁹ ועתה אדני ראה את גערתם ותן לעבדיך לדבר את דברך בכל בטחון לבם׃³⁰ בנטתך את ידך למרפא ולתת אתות ומופתים בשם ישוע עבדך הקדוש׃³¹ ויהי כאשר התפללו וינע המקום אשר היו נקהלים שם וימלאו כלם רוח הקדש וידברו את דבר האלהים בבטחון לבב׃

³² וקהל המאמינים היה להם לב אחד ונפש אחת ואין איש מהם אומר על אשר בידו לי הוא כי הכל היה להם בשתפות׃³³ ובגבורה גדולה יעידו השליחים על תקומת האדון ישוע וחסד גדול נמשך לכלם׃³⁴ כי לא היה בהם חסר דבר כי כל בעלי שדות ובתים מכרו אתם ויביאו את כסף מחירם׃³⁵ וישימהו לרגלי השליחים ויתן לכל איש ואיש די מחסרו׃³⁶ ויוסף אשר כנוהו השליחים בשם בר נבא פרושו בן הנחמה איש לוי אשר נולד בארץ כתים׃³⁷ גם לו היה שדה וימכרהו ויבא את הכסף וישימהו לרגלי השליחים׃