Read the Bible

¹ ואלה הבאים אל דויד לציקלג עוד עצור מפני שאול בן קיש והמה בגבורים עזרי המלחמה׃² נשקי קשת מימינים ומשמאלים באבנים ובחצים בקשת מאחי שאול מבנימן׃³ הראש אחיעזר ויואש בני השמעה הגבעתי ויזואל ופלט בני עזמות וברכה ויהוא הענתתי׃⁴ וישמעיה הגבעוני גבור בשלשים ועל השלשים וירמיה ויחזיאל ויוחנן ויוזבד הגדרתי׃⁵ אלעוזי וירימות ובעליה ושמריהו ושפטיהו החריפי׃⁶ אלקנה וישיהו ועזראל ויועזר וישבעם הקרחים׃⁷ ויועאלה וזבדיה בני ירחם מן הגדור׃⁸ ומן הגדי נבדלו אל דויד למצד מדברה גברי החיל אנשי צבא למלחמה ערכי צנה ורמח ופני אריה פניהם וכצבאים על ההרים למהר׃⁹ עזר הראש עבדיה השני אליאב השלשי׃¹⁰ משמנה הרביעי ירמיה החמשי׃¹¹ עתי הששי אליאל השבעי׃¹² יוחנן השמיני אלזבד התשיעי׃¹³ ירמיהו העשירי מכבני עשתי עשר׃¹⁴ אלה מבני גד ראשי הצבא אחד למאה הקטן והגדול לאלף׃¹⁵ אלה הם אשר עברו את הירדן בחדש הראשון והוא ממלא על כל גדיתיו ויבריחו את כל העמקים למזרח ולמערב׃¹⁶ ויבאו מן בני בנימן ויהודה עד למצד לדויד׃¹⁷ ויצא דויד לפניהם ויען ויאמר להם אם לשלום באתם אלי לעזרני יהיה לי עליכם לבב ליחד ואם לרמותני לצרי בלא חמס בכפי ירא אלהי אבותינו ויוכח׃¹⁸ ורוח לבשה את עמשי ראש השלושים לך דויד ועמך בן ישי שלום שלום לך ושלום לעזרך כי עזרך אלהיך ויקבלם דויד ויתנם בראשי הגדוד׃¹⁹ וממנשה נפלו על דויד בבאו עם פלשתים על שאול למלחמה ולא עזרם כי בעצה שלחהו סרני פלשתים לאמר בראשינו יפול אל אדניו שאול׃²⁰ בלכתו אל ציקלג נפלו עליו ממנשה עדנח ויוזבד וידיעאל ומיכאל ויוזבד ואליהוא וצלתי ראשי האלפים אשר למנשה׃²¹ והמה עזרו עם דויד על הגדוד כי גבורי חיל כלם ויהיו שרים בצבא׃²² כי לעת יום ביום יבאו על דויד לעזרו עד למחנה גדול כמחנה אלהים׃

²³ ואלה מספרי ראשי החלוץ לצבא באו על דויד חברונה להסב מלכות שאול אליו כפי יהוה׃²⁴ בני יהודה נשאי צנה ורמח ששת אלפים ושמונה מאות חלוצי צבא׃²⁵ מן בני שמעון גבורי חיל לצבא שבעת אלפים ומאה׃²⁶ מן בני הלוי ארבעת אלפים ושש מאות׃²⁷ ויהוידע הנגיד לאהרן ועמו שלשת אלפים ושבע מאות׃²⁸ וצדוק נער גבור חיל ובית אביו שרים עשרים ושנים׃²⁹ ומן בני בנימן אחי שאול שלשת אלפים ועד הנה מרביתם שמרים משמרת בית שאול׃³⁰ ומן בני אפרים עשרים אלף ושמונה מאות גבורי חיל אנשי שמות לבית אבותם׃³¹ ומחצי מטה מנשה שמונה עשר אלף אשר נקבו בשמות לבוא להמליך את דויד׃³² ומבני יששכר יודעי בינה לעתים לדעת מה יעשה ישראל ראשיהם מאתים וכל אחיהם על פיהם׃³³ מזבלון יוצאי צבא ערכי מלחמה בכל כלי מלחמה חמשים אלף ולעדר בלא לב ולב׃³⁴ ומנפתלי שרים אלף ועמהם בצנה וחנית שלשים ושבעה אלף׃³⁵ ומן הדני ערכי מלחמה עשרים ושמונה אלף ושש מאות׃³⁶ ומאשר יוצאי צבא לערך מלחמה ארבעים אלף׃³⁷ ומעבר לירדן מן הראובני והגדי וחצי שבט מנשה בכל כלי צבא מלחמה מאה ועשרים אלף׃³⁸ כל אלה אנשי מלחמה עדרי מערכה בלבב שלם באו חברונה להמליך את דויד על כל ישראל וגם כל שרית ישראל לב אחד להמליך את דויד׃³⁹ ויהיו שם עם דויד ימים שלושה אכלים ושותים כי הכינו להם אחיהם׃⁴⁰ וגם הקרובים אליהם עד יששכר וזבלון ונפתלי מביאים לחם בחמורים ובגמלים ובפרדים ובבקר מאכל קמח דבלים וצמוקים ויין ושמן ובקר וצאן לרב כי שמחה בישראל׃